Elgün Mənsimov

Beynəlxalq Jurnalistlər Federasiyasının, Jurnalistlərin Həmkarlar İttifaqının (JuHİ) və Azərbaycan Jurnalistlər Birliyinin üzvü

Azərbaycanlı jurnalist Elgün Ziyəddin oğlu Mənsimov 1988-ci il fevralın 14-də Tərtər rayonunun Dəmirçilər kəndində anadan olub. 2005-ci ildə Azər Məmmədov adına Dəmirçilər kənd orta məktəbini fərqlənmə ilə bitirib. 2006-2007-ci illərdə Azərbaycan Daxili Qoşunlarında hərbi xidmətdə olub. Xidməti uğurla başa vuraraq çavuş rütbəsilə (taqım komandirinin müavini) tərxis olunub.

2008-ci ildə ali məktəbə sənəd verib və imtahanda yüksək nəticə göstərərək Bakı Dövlət Universitetinin Jurnalistika [1] fakültəsinə qəbul olunub[2]. Təhsilinə görə Tərtər rayon İcra Hakimiyyəti və Təhsil Şöbəsinin müvafiq “Fəxri Fərman” və diplomları ilə təltif edilib.

Birinci kursdan etibarən, müntəzəm olaraq dövrü mətbuatla əlaqə saxlayıb, bir neçə qəzet və internet portalında məqalələri, reportajları dərc edilib. 2009-2013-cü (yanvar) illərdə "Kaspi" qəzetinin (gündəlik ictimai-siyasi qəzet) müxbiri kimi işləyib. 2013-2017 illərdə Rəsmi Dövlət Qəzeti - Azərbaycan Respublikası Milli Məclisinin orqanı "AZƏRBAYCAN"ın parlament müxbiri kimi çalışıb. 2018-ci ildə AzNews.az informasiya portalında Siyasət şöbəsinin redaktoru olub. 2019-cu ilin may ayından Trend İnformasiya Agentliyində Azərbaycan dilli xidmətin müdir müavinidir.

Elgün Mənsimov Beynəlxalq Jurnalistlər Federasiyasının, Jurnalistlərin Həmkarlar İttifaqının (JuHİ) və Azərbaycan Jurnalistlər Birliyinin üzvüdür.

Elgün Mənsimov, həmçinin, bir neçə araşdırma məqalə [3] [4], reportaj hekayə, oçerk və esse müəllifidir.