Abdul Hacıbaba oğlu Həşimov

Həşımov Abdul Hacıbaba oğlu 1948-ci ildə anadan olmuşdur.

Əmək fəaliyyətinə 1965-ci ildən Sumqayıt şəhər Corat qəsəbə 7 No li orta məktəbdə musiqi dərnəyinin rəhbəri kimi başlamışdır. 1970-ci ildə Sumqayıt orta ixtisas musiqi məktəbini fərqlənmə diplomu ilə bitirərək, orada müəllim kimi saxlanılmışdır. 1976-cı ildə tar ixtisası üzrə Üzeyir Hacıbəyov adına Azərbaycan Dövlət Konservatoriyasını bitirmişdir.

Pedaqoji fəaliyyətlə paralel olaraq, müxtəlif məsul və ictimai vəzifələrda çalışmışdır. İşlədiyi dövrdə o, özünü yüksək ixitisaslı mütəxəssis kimi göstərmişdir.

Pedaqoji və ifaçılıq fəaliyyəti ilə yanaşı A.H. Haşımov elmi-yaradıcılıq işləri də məşğul olur. Onun Azərbaycan xalq musiqisi və muğamlara dair məqalələri Azərbaycan Respublikası Milli Elmlər Akademiyası Bəhmənyar adına Fəlsəfə və Hüquq institutunun «Ekologiya, fəlsəfə, mədəniyyət» məcmuəsində, «Şərqi», «Musiqi dünyası» jurnallarında və digər dövri mətbuatda dərc edilmişdir.

Musiqi texnikumlarının (hazırda kolleclərinin) «Xanəndə» ixtisası üzrə «Ixtisas» və «Konsermeysterlə iş», «Xalq çalğı alətləri» ixtisası üçün «Müşayiət təcrübəsi» və «ifaçılıq təcrübəsi» fənnləri üzrə Təhsil Nazirliyi tərəfindən təsdiq edilmiş fənn proqramlarının tərtibçilərindəndir.

A.H.Haşımovun «Rast» muğamı adlı metodiki tövsiyəsi, tar üçün«10 zərbi-muğam», qarmon aləti üçün «10 zərbi-muğam» dərs vəsaitləri, həmçinin Adil Gərayın tar üçün «Muğam etüdləri» vəsaitinin qarmon aləti üçün işləməsi Respublika Mədəniyyət və Turizm Nazirliyi tərəfindən bəyənilmiş və tədrisdə istifadə üçün tövsiyə edilmişdir.

A.H.Haşımov müxtəlif festival və müsabiqələrin laureatıdır. 1970-ci ildə SSRİ Ali Sovetinin Rəyasət heyəti tərəfindən «Rəşadətli əməyə görə» medalı ilə təltif edilmişdir.

A.H.Həşimovun yetişdirdiyi tələbələr respublikanın müxtəlif musiqi tədrisi müəssisələrində pedaqoji və konsert fəaliyyəti göstərirlər. Təhsildə qazandığı uğurlara, ictimai-siyasi və mədəni-kütləvi tədbirlərdə fəal iştirakına görə dəfələrlə texnikum rəhbərliyi tərəfindən təşəkkür almışdır.

A.H. Haşımov, muisiqi ictimaiyyətinin rəğbətini qazanmış, lent yazıları Azərbaycan Radio və Televiziya verlişləri şirkətinin fondunda saxlanılan «Tello» və «Dügah» folklor ansambllarının rəhbərlərindən biri olmuşdur.

Təhsildə qazandığı uğurlara görə A.Haşımov 12 noyabr 2008-ci ildə Təhsil Nazirliyi tərəfindən «Azərbaycan Respublikasının qabaqcıl təhsil işçisi» döş nişanına layiq görülmüşdür.