Ağasəlim Əmri

Qəzəlxan Ağasəlim Əmri Binəli

Cəfərov Ağasəlim Namiq oğlu 16 iyul 1984-cü ildə Bakı şəhərində ziyalı ailədə dünyaya göz açıb. İlk təhsilini Binə qəsəbəsindəki 136-nömrəli orta məktəbdə alıb. 1998-ci ildən şer yazmağa başlamışdır. Ağasəlim Əmri kiçik yaşlarından poeziyaya maraq göstərmiş və ilk şerini tariximizin qan yaddaşı olan "20 yanvar" faciəsinə həsr etmişdir. 2002-2004-cü illərdə Azərbaycan Ordusu sıralarında xidmət etmişdir. Şerləri dövri mətbuatda, internet saytlarında və almanaxlarda dərc olunmaqdadır. Əmri bir müddət "Saleh" təxəllüsü ilə şerlər yazmışdır. Şerləri xanəndələr tərəfindən ifa edilir, sözlərinə mahnılar bəstələnir. “Hicran gecəsi”-adlı ilk kitabı 2014-cü ildə işıq üzü görüb. Azərbaycan Yazıçılar Birliyinin üzvüdür.

HƏR ŞEY VƏTƏN ÜÇÜN....

“Hər şey Vətən üçün” – budur ən ali şüarım,

Sənsən şərəfim, izzətim, eşqimlə vüqarım,

Uğrunda verim can, ola qoynunda məzarım,

Mən aşiqinəm, sən mənim öz sevgili yarım,

Məndən ala bilməz səni biganə, mənimsən,

Can Azəribaycan, Ana yurdum, Vətənimsən.

Cənnət desəm ünvanına, səhv etmərəm əsla,

Can tazələnir hüsnünə etdikcə təmaşa,

Eşqindi sənin bəxş eləyən ömrümə mə`na,

Mən eşqin ilə şurə gələn bülbüli – şeyda,

Sən bağu Behiştim, əbədiyyət çəmənimsən,

Can Azəribaycan, Ana yurdum, Vətənimsən.

Gəldim qədəmim şövq ilə toprağına qoydum,

Sevginlə göz açdım, səni gördüm, sənə uydum,

Səndən, dilim ağzımda yanar, söyləsə doydum,

Fani olub eşqində, bəqa zövqünü duydum,

Sən varlığımın mənşəyi, ruhum, bədənimsən,

Can Azəribaycan, Ana yurdum, Vətənimsən.

Səndən uzaq, Əmri sürər öz ömrünü kövrək,

Yetmək olar ancaq sənə, qəlbindəki istək,

Hicrinlə verər can, diləyi olmasa gerçək,

Səndən alıram kam, Ana qoynundan uşaq tək,

Sən qəm dolu dünyada, pənahım, güvənimsən,

Can Azəribaycan, Ana yurdum, Vətənimsən.

Ağasəlim Əmri Binəli