Şərif Həmid oğlu Kərimli, 1954-cü il iyunun 22-də Marneuli rayonunun Baydar kəndində anadan olub.
1972-ci ildə Baydar orta məktəbini, 1977-ci ildə Azərbaycan Dövlət Universitetinin Jurnalistika fakültəsini bitirdikdən sonra «Yazıçı» və «İşıq» nəşriyyatlarında redaktor, şöbə mudiri vəzifələrində çalışıb. 1987-ci ildən 1989-cu ilədək «Gənclik», «Molodost» jurnalında ədbi işçi, məsul katib, redaktor müavini vəzifələrində işləyib. 1989-cu il oktyabrın 5-dən, qəzetin ilk sayından 1995-ci ilədək «Azərbaycan» qəzetində əvvəlcə məsul katib, baş redaktor müavini və baş redaktor vəzifələrini tutub.
Şərif Kərimli təkcə Azərbaycanın ictimai-siyasi, sosial-mənəvi olaylarına işıq tutmaqla kifayətlənməmiş, həyatının və yaradıcılığının leytmotivinə, qayəsinə, mənasına çevirdiyi Borçalı və Azərbaycan-Gürcüstan dostluğu ideyasını bu ölkələrdə çıxan qəzetlərlə yanaşı, dünyanın tanınmış, nüfuzlu, yüksək tirajlı ingilisdilli qəzetlərində də («Novoe russkoe slovo» (ABŞ), «Nezavisimaya qazeta» (Rusiya), «İslami Birlik» (İran), «Sabah» (Turkiyə) yazmış və təbliğ etmişdir.
Dəfələrlə Borçalı problemini ən yüksək rəsmi səviyyələrdə diqqətə çatdırmış, Azərbaycan və Gürcüstan prezidentləri ilə görüşmüş və bu məsələ ilə bağlı soydaşlarımızın arzu və istəklərini ifadə edən təkliflər vermişdir.
Şərif Kərimli yüzlərlə siyasi-publisistik məqalə ilə yanaşı, «Rəşid Pəhləvan», «Sali Süleyman», «Pəhləvan Müsəllim», «Qaytarılan köç karvanı», «8712 nömrəli əsir», «Gürcüstan: ikili standart siyasətinin yeni qurbanı» kimi bədii və bədii-publisistik kitabların müəllifidir. 2016-cı ildə 4 cildlik "Ötən illərin harayı" adlı seçilmiş sənədli, bədii və bədii-publisistik yazılarının iki cildi çapdan çıxmışdır. Kitaba 40 illik jurnalistlik fəaliyyətinin əsasən “Azərbaycan” və “Sabah”, eləcə də “Respublika”, “Azərnyus”, “Gürcüstan”, "Xalq qəzeti", “Şərq”, “525-ci qəzet”, “Gün”, “Unikal” və s. qəzetlərdə dərc olunmuş publisistik yazıları daxil edilmişdir. Millət vəkilləri - xalq şairi, sabiq mətbuat naziri Sabir Rüstəmxanlının və akademik Nizami Cəfərovun yazdıqları ön sözdə vurğulandığı kimi, dövrün hadisələrinə doğru-düzgün münasibət sərgiləyən bu əsərlər sənətkarlıq və peşəkarlıq baxımından çağdaş mətbuatımıza örnək ola biləcək dəyərlərin daşıyıcısıdır. Kitabda jurnalistikanın bütün janrlarında publisistik və bədii-publisistik əsərlər yer almışdır. Yaxın vaxtlarda növbəti iki cild işlq üzü görəcək.
1992-ci ildən “Qızıl Qələm” mükafatı laureatıdır.
Şərif Kərimli Odlar Yurdu, Avrasiya, Slavyan və Beynəlxalq Universitetlərin jurnalistika fakültələrində 10 ildən artıq pedaqoji fəaliyyətlə məşğul olmuş, gənc jurnalistləri müasir jurnalistikanın problemləri ilə nəzəri və praktiki cəhətdən tanış etmişdir.
Hazırda Azərbaycan Respublikası Əqli Mülkiyyət Agentliyinin Əqli Mülkiyyət Hüquqlarının Təminatı Mərkəzində çalışan Şərif Kərimli burada işlədiyi son beş ildə "Patent haqqında Azərbaycan Respublikasının Qanunu", "Əmtəə Nişanları haqqında Azərbaycan Respublikasının Qanunu", “Azərbaycan milli musiqi alətlərinin patentlə mühafizəsi”, “Azərbaycan brendləri”, “Haaqa sistemi” adlı maraqlı kitablar nəşr etdirmişdir.
Son 200 ildə Azərbaycan xalqının əqli mülkiyyət sahəsində əldə etdiyi beyin nailiyyətləri haqqında “İxtiralar - Azərbaycanın beyin ensiklopediyası” adlı ensiklopedik fundamental elmi-tədqiqat işi üzərində fəaliyyətini davam etdirir. Albom-kataloq janrında tərtib olunacaq bu kitab tarixdə xalqımızın elmi, texniki, tibbi və s. sahələrdə xidmətlərini sivil dünyaya bir daha çatdırmaqda müstəsna rol oynayacaq.
Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edin