İsrafil Nəzərov

İsrafil Nəzərov 1911-ci ildə Bakının Balaxanı kəndində anadan olmuşdur. Orta məktəbi bitirdikdən sonra Azərbaycan Dövlət Unuversitetində təhsil almış, bu illərdə əmək fəaliyyətnə başlayaraq  “Gənc işçi”, sonradan “Yeni yol” qəzetlərində işləmiş və hər iki qəzetin redaktoru vəzifələrinə qədər yüksəlmişdir. Azərbaycan Teleqraf Agentliyində redaksiya müdiri vəzifəsində çalışmışdır. İkinci Dünya müharibəsi illərində (1941-1942) İranda, Təbriz şəhərində çıxan “Vətən yolunda” qəzetinin redaktor müavini, 1942-1946-cı illərdə “Vətən uğrunda” ordu qəzetinin redaktoru vəzifəsində çalışmışdır. Ordudan tərxis olunduqdan sonra “Kommunist” qəzetinin məsul katibi, 1949-1953-cü illərdə “Uşaqgəncnəşr” və “Azərnəşr”in direktoru vəzifələrində çalışmışdır. 1953-1956-cı illərdə Mədəniyyət Nazirliyinin Radio Məlumatları Baş İdarəsinə rəhbərlik edərkən Azərbaycanda televiziya yayımının təşkili, indiki AzTV binasının inşası, onun avadanlıqla təchiz edilməsi, ilk kadrların cəlb olunması və televiziya yayımına başlaması işlərinə rəhbərlik etmişdir. 1956-cı ilin noyabrında o, mədəniyyət nazirinin birinci müavini vəzifəsinə təyin edilmiş və bu nazirlikdə əvvəl radio və televiziya, daha sonra incəsənət və nəşriyyat sahələrinə kuratorluq etmişdir. 1963-cü ildə Dövlət Mətbuat Komitəsi yaradıldıqda komitənin sədri vəzifəsinə təyin edilmiş və 1974-cü ildə təqaüdə çıxanadək bu vəzifədə çalışmışdır.

İsrafil Nəzərov respublikanın ictimai-siyasi həyatında fəal iştirak etmişdir. O,1959-cu ildə Azərbaycan Jurnalistlər İttifaqı yarandığı gündən on beş il ərzində İttifaqın rəhbəri, eyni zamanda SSRİ Jurnalistlər İttifaqının katibi olmuşdur. VI, VII və VIII çağırış Azərbaycan Ali Sovetinin deputatı,  Azərbaycan KP MK-nın beş qurultayında Mərkəzi Komitənin üzvü seçilmişdir. Gənclik illərində respublika komsomolu Mərkəzi Komitəsinin Büro üzvlüyünə daxil edilmişdir. Dövlət Mükafatları üzrə respublika komitəsinin üzvü olmuşdur.  

İsrafil Nəzərov 1945-ci ildə Azərbaycan Dövlət Universitetində jurnalistika şöbəsinin, sonralar Jurnalistika fakultəsinin yaradılmasında fəal iştirak etmiş, uzun illər burada milli jurnalistika kadrlarının yetişdirilməsinə öz tövhəsini vermişdir.

İsrafil Nəzərovun doqquz övladının hamısı ali təhsil almış, müxtəlif peşə sahibləri olmuşlar, onların arasında müəllimlər, həkim, hüquqşünas, rejissor, kitabxanaçı, kinooperator vardır.  

İsrafil Nəzərov 21 dekabr 1987-ci ildə vəfat etmiş, doğulduğu Balaxanı kəndində dəfn olunmuşdur.         

İsrafil Nəzərovun xidmətləri "Qırmızı Əmək Bayrağı"(1962), iki dəfə "Şərəf Nişanı" (1946, 1971) ordenləri, “Əməkdə fərqlənməyə görə”, “Qafqazın müdafiəsinə görə” və bir neçə başqa medalla, Ümumdünya Jurnalistlər Birliyinin Qızıl medalı (1971), “Qızıl qələm” (1967) mükafatı ilə təltif edilmişdir.  Əməkdar Mədəniyyət İşçisi fəxri adına layiq görülmüşdür (1967).

Nurəddin Babayev “Mətbuatda keçən ömür”, “Ədəbiyyat qəzeti”, 30 avqust 1991-ci il

Qılman İlkin “Bir görüşün təəssüratı”, “Bakı” qəzeti, 13 aprel 1985-ci il

Rəşid Mahmudov “Jurnalistikamızın İsrafil müəllimi”. “Xalq qəzeti”, 16 iyun 2000-ci il

Cəmil Əlibəyov “Əməli hikmət – ilahi məhəbbətdir”. “525-ci qəzet”, 20 dekabr 2003-cü il

Telman Mehdixanlı “Mətbuatın cəfakeşi”. “Azərbaycan” qəzeti, 20 sentyabr 2006-cı il

Əziz Mirəhmədov “Azərbaycan jurnalistləri və naşirləri” (Ensiklopediya). Bakı, “Ərgünəş”, 2013

Məsudə ƏVƏZQIZI “Halallıq istəyirəm”  “525-ci qəzet”, 20 fevral 2013-cü il