İsa Qaraşov

Qaraşov İsa Tapdıq oğlu 1946-cı ilin 3 iyul tarixində Ağdam rayonunun Əlimədətli kəndində kolxozçu ailəsində anadan olub.

1952-1963-cü illərdə Əlimədətli kənd orta məktəbində ibtidai təhsil alıb.1963-cü ildə prta məktəbi bitirib Ç.İldırım adına Azərbaycan Politexnik İnstitutunun inşaat-hidromeliorasiya fakültəsinə qəbul olunub.

1963-1964 illərdə Bakı şəhərində 48 nömrəli tikinti idarəsində fəhlə işləmişdir.

1968-ci ildə institutu bitirib təyinatla Moskva “İttifaqsukanallahiyə” İnstitutunun Bakı bölməsinə göndərilmiş, 1973-cü ilə qədər bu institutda mühəndis, baş mühəndis və hidrotexnika bölməsinin rəisi vəifələrində işləmişdir.

1971-1991-ci illərdə Sovet İKP üzvü olub.

1984-cü ildə Bakı Ali Partiya məktəbini fərqlənmə ilə bitirmişdir.

Komsomol sıralarında fəaliyyət göstərdiyi zaman işlədiyi institutun komsomol komitəsinin katibi, Respublika LKGİ MK-nin üzvü seçilmişdir.

1972-ci ildə elm və texnika sahəsində Lenin komsomolu Mükafatı Laureatı olmuşdur.

İ.T.Qaraşov komsomol, sovet və partiya orqanlarında çalışdığı illərdə aşağıdakı vəzifələrdə çalışmışdır:

1973-cü ilin aprel ayından Azərbaycan LKGİ MK-də təşkilat şöbəsində təlimatçı, 1973-cü ilin dekabr ayından Nəsimi rayon komsomol komitəsinin 1-ci katibi, 1975-ci ilin iyun ayından Nəsimi rayon Xalq Deputatları Soveti İcraiyyə Komitəsinin sədr müavini, 1977-ci ilin iyun ayından Nəsimi rayon Xalq Nəzarəti Komitəsinin sədri, 1979-cu ilin dekabr ayından Nəsimi rayon Partiya Komitəsinin ikinci katibi, 1980-ci ilin dekabr ayından 1989-cu ilin fevral ayına qədər Nəsimi rayon Xalq Deputatları Soveti İcraiyyə Komitəsinin sədri, 1989-1990-cı illərdə Azərbaycan KP MK-da təşkilat partiya işi şöbəsində məsul təşkilatçı və bu şöbənin müdir müavini, 1990-cı ilin iyul ayından Oktyabr rayon Partiya Komitəsinin birinci katibi, 1991-ci ilin yanvarından Oktyabr rayon Xalq Deputatları Sovetinin sədri; 1990-1995-cı illərdə Azərbaycan Respublikası Ali Sovetinin XII çağırış deputatı olmuşdur.

İ.T.Qaraşov 1991-cı ilin oktyabr ayında Respublika və şəhər rəhbərliyi tərəfindən Oktyabr rayon İcra Hakimiyyətinin başçısı vəzifəsində namizədliyi irəli sürülmədiyinə görə ərizəsi ilə tutduğu vəzifədən azad olunmuşdur.

1992-ci ilin yanvarından Bakı Şəhər İcra Hakimiyyəti Başçısının müavini vəzifəsində çalışmış, 1993-cü ilin yanvar ayında tutduğu vəzifəyə Xalq Cəbhəsi tərəfindən başqa şəxsin təyin olunması ilə əlaqədar ərizə vermədən Başçının müavini vəzifəsini tərk etmişdir.

1993-cu ilin may ayında Bakı Şəhər İcra Hakimiyyətinin Xarici Əlaqələr Baş İdarəsinin rəisi vəzifəsinə təyin olunmuş, 1999-cu ilin iyulunda Baş İdarənin ləğv olunması ilə əlaqədar Xarici Əlaqələr və İnvestisiya proqramları Departamentinin sədr müavini təyin olunmuş, 2017-ci ilin martın 1-dən Dövlət Qulluqçusu kimi təqaüdə çıxmışdır.

İ.T.Qaraşov Respublika, şəhər, rayon, partiya, sovet və sair seçki orqanlarında iştirak etmiş, mütəmadi olaraq rayon və Bakı şəhər Xalq Deputatları Sovetinə deputat seçilmişdir.

İ.T.Qaraşov dəfələrlə rayon, şəhər, respublika partiya konfranslarında, qurultaylarında partiya komitələrinin və 1990-cı ildə Azərbaycan KP MK nəzarət-təftiş komisiyasının üzvü seçilmişdir.

İ.T.Qaraşov 8 may 2001-ci il tarixdə Azərbaycan Respublikası Əsilzadələr Məclisində Əsilzadələr Məclisinin üzvü təsdiq olunmuşdur. (Şəhadətnamə № 394)

2010-cu ildə Ümumdünya Sülh Federasiyası və Dünya Sülh Beynəlxalq Federasiyası tərəfindən “Sülh Səfiri” elan olmuşdur.

01 noyabr 2017-ci ildən Azərbaycan Respublikası Müharibə, Əmək və Silahlı Qüvvələr Veteranları Təşkilatının üzvüdür.

Ailəlidir, üç övladı var.

2018-ci ilin oktyabrında İ.T.Qaraşov Ümumittifaq Lenin Kommunist Gənclər İttifaqının 100 illiyinə həsr olunmuş medalla təltif olunmuş, Təşkilat Komitəsi tərəfindən Komsomol həyatında fəal iştirakına görə ona təşəkkürnamə təqdim olunmuşdur.

İ.T.Qaraşov 1980-ci ildə SSRİ Ali Sovetinin qərarı ilə “Əməkdə fərqlənməyə görə” medalı ilə təltif olunmuşdur.

Azərbaycan Respublikasının Prezidenti İlham Əliyevin 9 aprel 2015-ci il tarixli Sərəncamı ilə Azərbaycan Respublikasında Dövlət Qulluğunda Fərqlənən Şəxslərin Təltif Edilməsi Haqqında Azərbaycan Respublikası Prezidentinin 22 iyun 2009-cu il tarixli, 324 nömrəli sərəncamı ilə Azərbaycan Respublikasında uzun müddət dövlət qulluğunda səmərəli fəaliyyət göstərdiyinə görə Qaraşov İsa Tapdıq oğlu “Dövlət qulluğunda fərqlənməyə görə” medalı ilə təltif edilmişdir.^[1]

https://adalet.az/az/posts/detail/isa-qarasov-75-2021-07-03-160657 http://archive.redcrescent.org.az/news/post-4262.html