İrma Çremoşnik (sloven. Irma Čremošnik; 12 yanvar 1916[1], Arad – 29 iyun 1990[1], Slano[d]) — Sloveniya-Yuqoslaviya arxeoloqu və filoloqu. O, Bosniya və Herseqovinada qədim Roma yaşayış məntəqələrinin qazıntıları ilə tanınmışdır.
| İrma Çremoşnik | |
|---|---|
| Doğum tarixi | 12 yanvar 1916[1] |
| Doğum yeri | |
| Vəfat tarixi | 29 iyun 1990[1] (74 yaşında) |
| Vəfat yeri |
|
| Atası | Qriqor Çremoşnik[d] |
İrma Çremoşnik indiki Rumıniyanın Arad şəhərində, Sloveniya tarixçisi Qreqor Çremoşnikin ailəsində anadan olmuşdur. O, Sarayevoda böyümüşdür. Çremoşnikin atası burada Bosniya və Herseqovina Milli Muzeyində işləyirdi.[2] Sarayevoda məktəb və gimnaziyanı bitirdikdən sonra o, Makedoniyaya köçmüşdür. Onun atası burada Skopye Universitetinin fəlsəfə fakültəsində orta əsr tarixi dərs deyirdi. Çremoşnik bu universitetə daxil olaraq klassik filologiya təhsili almışdır. Universiteti bitirdikdən sonra 1940–1941-ci illərdə Tetovoda, 1941-ci ildə Skopyedə, 1941–1942-ci illərdə isə Nişdə məktəbdə müəllimlik etmişdir.[3]
Çremoşnik 1944–1947-ci illərdə Belqrad İncəsənət Muzeyində kurator, daha sonra Bosniya və Herseqovina Milli Muzeyində işləmişdir. Lyublyana Universitetinin fəlsəfə fakültəsində arxeologiya təhsili almış və 1952-ci ildə burada doktorluq dərəcəsi qazanmışdır.[3] 1976-cı ildə təqaüdə çıxana qədər Milli Muzeydə çalışmışdır.[4][5] 29 iyun 1990-cı ildə Slanoda vəfat etmiş və Lyublyanada dəfn olunmuşdur.[3]
Çremoşnik müasir Bosniya və Herseqovina ərazisində, xüsusilə Vişiçi kəndi (Çaplina obşinası) və Panik (Bileça obşinası) ərazisində qədim Roma villalarının və Roma yaşayış məntəqələrinin bir sıra arxeoloji qazıntılarına rəhbərlik etmişdir.[4] Vişeqrad obşinasında yerləşən Muşiçi və Bielyina obşinasında yerləşən Batkoviçdə slavyan yaşayış məntəqələrinin qazıntılarında iştirak etmişdir. Bunlar Bosniya və Herseqovinada ən qədim slavyan yaşayış məntəqələri kimi tanınır.[3][6] Çremoşnikin tanınmış əsərlərindən biri 1984-cü ildə nəşr olunan "Roma dövrünün mozaikaları və divar rəsmləri" (sloven. Mozaici i zidno slikarstvo rimskog doba) əsəridir. O həmçinin, atasının əsərlərinin edilməsində və nəşrində iştirak etmişdir.[4]
- ↑ 1 2 3 4 Brozović D., Ladan T. Irma Čremošnik // Hrvatska enciklopedija (xorv.). LZMK, 1999. 9272 s.
- ↑ Alen Zečević. "Sjećanje na arheologinju koja je karijeru posvetila antici" (bosniya). Al Jazeera. 2022-05-22. 2023-03-13 tarixində arxivləşdirilib. İstifadə tarixi: 2023-03-13.
- ↑ 1 2 3 4 Edin Veletovac. Irma Čremošnik i njen doprinos u oblasti antičke arheologije na prostoru Bosne i Hercegovine // Naučna/Znanstvena konferencija „Bosanskohercegovačke naučnice/znanstvenice i njihov istraživački rad”. Mostar. 2018. 235–244.
- ↑ 1 2 3 Ignacij Voje. Dr. Irma Čremošnik : (12.I.1916 -29.VI.1990) // Zgodovinski časopis . 44 (sloven) (3). 1990. 2023-11-15 tarixində arxivləşdirilib.
- ↑ "Čremošnik, Irma". Hrvatska enciklopedija (xorvat). 2023-03-11 tarixində arxivləşdirilib. İstifadə tarixi: 2023-03-13.
- ↑ Irma Čremošnik. Nalazi prvih ranoslavenskih naselja u Bosni i Hercegovini // Zgodovinski časopis . 35 (serb-xorvat) (1–2). 1981. 93—99.