İngiltərə dekorativ teryeri — dekorativ itlər qrupuna daxil olan kiçik ölçülü teryer cinsi. Bu cins öz zərif quruluşu, aktiv təbiəti və qədim tarixi ilə seçilir.
| İngiltərə dekorativ teryeri | |
|---|---|
 | |
| Mənşəyi | |
| Ölkə | |
 Vikianbarda əlaqəli mediafayllar | |
İngiltərə dekorativ teryerinin boyu 25–30 sm, çəkisi isə 2.7–3.6 kq arasında dəyişir. Cinsin yeganə qəbul edilən rəngi qara və qəhvəyi rənglərdir. Ayaqlarda, döşdə və üzdə qəhvəyi işarələr ola bilər. Hərəkətləri bir atın geniş yürüşünü xatırladır, gözləri badam formasında, qulaqları isə "şam alovu" şəklindədir.[1]
Bu cins həm bitki, həm də heyvan mənşəli qidaları ehtiva edən balanslı bir pəhrizə ehtiyac duyur. Aktiv təbiətinə görə, yetkinlik dövründə qidalanmasında karbohidratların miqdarı azaldılmalı, protein tərkibi isə artırılmalıdır. Sağlam yağlar, vitaminlər və minerallarla zəngin qidalar, həmçinin yüksək keyfiyyətli quru, yaş və ya çiy yemlər bu cins üçün uyğun seçimlərdir.[2]
İngiltərə dekorativ teryeri sağlamlığı ilə seçilsə də, bəzi genetik və xroniki xəstəliklərə meyilli ola bilər. Katarakt xəstəliyi yaşlanma ilə əlaqəli olaraq gözlərdə bulanıqlıq yarada bilər. Patellar luksasiya diz qapağının yerindən çıxması ilə nəticələnir və genetik faktorlarla yanaşı travmalarla da əlaqələndirilir. Gənc itlərdə rast gəlinən dilat kardiomiyopatiya, genetik olaraq ürək xəstəliyi kimi özünü göstərə bilər. Leqq–Kalve–Pertes xəstəliyi femur sümüyünə təsir edən degenerativ bir vəziyyətdir. Xantinuriya isə metabolizmə təsir edən nadir genetik bir xəstəlikdir.[2]
İngiltərə dekorativ teryerinin mənşəyi Köhnə İngiltərə qara və qəhvəyi teryeri cinsinə dayanır və Mançester teryeri ilə yaxın əlaqədə olmuşdur. Viktoriya dövründə siçovul döyüşləri ilə məşhurlaşan bu cins, kiçik ölçüsünə baxmayaraq, böyük çeviklik və sürət nümayiş etdirirdi. Bu dövrdə Möhtəşən Tayni adlı bir İngiltərə teryeri yalnız 2.5 kq çəkiyə sahib olduğu halda, bir saatdan az müddətdə 200 siçovulu öldürərək diqqət mərkəzinə düşmüşdür. Siçovul döyüşlərinin qadağan edilməsindən sonra cins, gözəllik yarışmalarında iştirak etməyə başlamışdır. İlk dəfə 1903-cü ildə Miniatür qara və qəhvəyi teryer adı ilə İtçilik Klubu tərəfindən qeydə alınmışdır. 1960-cı ildən etibarən "İngiltərə dekorativ teryeri (Qara və qəhvəyi)" adı qəbul edilmişdir. Şimali Amerikada bu cins 1958-ci ilə qədər iki ayrı növ kimi tanınmış, lakin daha sonra bir cinsə daxil edilmişdir.[2]
- ↑ "The Breed Standard". 2008-12-17 tarixində orijinalından arxivləşdirilib. İstifadə tarixi: 2008-11-15.
- ↑ 1 2 3 Wilson, Roy. (2008). English Toy Terrier: Black and Tan. Upfront Publishing. ISBN 978-1844265442
