İlhamə Qədimova

İlhamə Qədimova 1992-ci ildə Bakı şəhəri 183 nömrəli məktəbin fizika-riyaziyyat-informatika təmayüllü sınaq sinfini bitirmişdir. 1992–1993-cü illərdə Ankara Universitetinin Türkcə Öyrətim Mərkəzində türk dili və hüquq türkcəsi təhsili almışdır.^[1]

1993–1997-ci illərdə Türkiyə Respublikasında dövlətlərarası saziş əsasında Ankara və Mərmərə Universitetlərinin Hüquq fakültələrində hüquq bakalavriatı təhsili almışdır.

1998–2001-ci illərdə Mərmərə Universitetinin Sosial Elmlər İnstitutunda dövlət hüququ ixtisası üzrə magistratura təhsili alaraq "SSRİ nin yenidən strukturlaşdırılmasında Azərbaycan nümunəsi" elmi işini tamamlamışdır.

2002–2009-cu illərdə isə cinayət hüququ sahəsində doktorantura təhsili alaraq "SSRİ, Azərbaycan və Türk Cəza hüququnda cəzanın məqsədi və cəzalandırma növləri" adlı elmi işini müdafiə etməklə fəlsəfə doktoru elmi dərəcəsi qazanmışdır.

Türk, rus və ingilis dillərini bilir.

Qədimova hüquqşünas-alim kimi fəaliyyətini hüquq elminin tətbiqi aspektlərinə yönəltmiş, xüsusilə hüquqi dövlət quruculuğu, inzibati islahatlar, vətəndaşlara xidmət sahəsində hüquqi mexanizmlərin təkmilləşdirilməsi istiqamətində çalışmışdır.

2000-ci illərdə Türkiyədə və Azərbaycanda özəl sektorda hüquqşünas və hüquqi konsultant kimi fəaliyyət göstərmişdir. 2010–2012-si illərdə Azərbaycan Respublikasının Prezidenti yanında Dövlət Qulluğu Məsələləri Komissiyasında hüquqi aktların ekspertizası, hüquqi normativ bazanın hazırlanması, hüquqi təminat və monitorinq sahələrində mütəxəssis kimi çalışmışdır.

2012–2018-ci illərdə Azərbaycan Respublikasının tanınmış sosial innovasiyası olan "ASAN xidmət" sisteminin formalaşdırılmasında iştirak etmiş, bu istiqamətdə rəhbərlik etdiyi hüquq komandası ilə birlikdə hüquqi aktların hazırlanması, tətbiqi və nəzarətinə cavabdeh olmuşdur.

Dövlət xidmətləri reyestri və ADA Universiteti mütəxəssisləri ilə birlikdə "ASAN xidmət" indeksi üzrə dövlət xidmətlərinin qiymətləndirilməsi mexanizminin qurulması və tətbiqində fəal iştirakçı olmuşdur.^[2]

2018-ci ildə kənd təsərrüfatı nazirinin müavini təyin edilmiş^[3], aqrar sahədə həyata keçirilən islahatlarda iştirak etmiş, həmin islahatların habelə Elektron Kənd Təsərrüfatı İnformasiya Sisteminin (EKTİS) hüquqi konsepsiyasının və idarəetmə modelinin yaradılması prosesinə rəhbərlik etmişdir.^[4]

2019-cu ildə aqrar sığortanın ölkədə formalaşdırılması, tətbiqi, vətəndaşlara çatdırılması, bu sahədə beynəlxalq əməkdaşlıq vasitəsilə yeni modelin ölkədə təkmilləşdirilərək tətbiqi üçün "Aqrar sığorta haqqında" Azərbaycan Respublikası Qanununun hazırlanmasında fəal iştirakçı olmuşdur.^[5]

2014–2018-ci illərdə Azərbaycan Dövlət İqtisad Universitetinin Türk Dünyası İqtisad Fakültəsində (TÜDİFAK) Konstitusiya hüququ, İnzibati hüquq və Beynəlxalq hüquq fənlərindən dərs demişdir. Onun pedaqoji fəaliyyəti hüquq sahəsində yeni kadrların hazırlanmasına yönəlmişdir. Fəaliyyəti dövründə müəllifi olduğu "İnzibati huquq" üzrə dərs proqramının hazırlanmasına və Azərbaycan Dövlət İqtisad Universitetinin Tədris-metodiki Şurasının 2016-cı il 22 yanvar tarixli qərarı ilə təsdiqlənməsinə nail olmuşdur.

2024-cü ildə BMT-nin İqlim Dəyişmələri üzrə COP29 konfransının təşkilat komitəsinin üzvü kimi fəaliyyət göstərmişdir. (2,8) Həmin ildə COP 29 tədbirləri çərçivəsində Azərbaycan tərəfindən irəli sürülən təşəbbüslərdən biri olan "Fermerlər üçün Bakı Harmoniya təşəbbüsününün formalaşdırılması, tanıdılması və tətbiqində iştirak etmişdir. https://www.agro.gov.az/az/news/191124

Evlidir, iki övladı var.

• "Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin 10 illiyi (2012–2022)" yubiley medalı (2023)
• "Azərbaycan Respublikası Minatəmizləmə Agentliyinin 25 illiyi (1998–2023)" yubiley medalı (2023)
• "Heydər Əliyevin 100 illiyi (1923–2023)" yubiley medalı (2024)