XIII Ümumdünya Şəhərsalma Forumu (ing. World Urban Forum XIII) və ya qısa WUF13 — Bakıda 2026-cı ildə keçirilməsi planlaşdırılan, Ümumdünya Şəhərsalma Forumunun 13-cü sessiyası.
| Ümumdünya Şəhərsalma Forumu (2026) | |
|---|---|
| ing. World Urban Forum XIII | |
| Keçirilmə tarixi | 17–22 may 2026 |
| Keçirildiyi yer |
 Bakı, Azərbaycan |
| Müzakirə edilən məsələlər | “Hər kəs üçün yaşayış yerləri: təhlükəsiz, dayanıqlı şəhərlər və yaşayış məskənləri” |
"Azərbaycan Respublikası Hökuməti ilə Birləşmiş Millətlər Təşkilatı arasında Ümumdünya Şəhərsalma Forumunun On Üçüncü Sessiyasının 2026-cı ildə Bakı şəhərində keçirilməsi üçün Ev Sahibi Ölkəyə dair Saziş" imzalanmışdır. 2024-cü ilin martında bu saziş Azərbaycan Prezidenti İlham Əliyev tərəfindən təsdiq olunmuşdur.[1] 25 aprel 2025-ci ildə Azərbaycan Respublikası Dövlət Şəhərsalma və Arxitektura Komitəsinin sədri Anar Quliyev XIII Ümumdünya Şəhərsalma Forumunun Azərbaycandakı milli kordinatoru təyin edilmişdir.[2] 5 iyun 2025-ci ildə forumun Azərbaycanda yüksək səviyyədə keçirilməsi üçün Təşkilat Komitəsi yaradılmışdır.[3]
XIII Ümumdünya Şəhərsalma Forumu 2026-cı ilin 17–22 may tarixlərində, Azərbaycanın paytaxt Bakı şəhərində keçiriləcək. Tədbirin keçiriləcəyi məkan Bakı Olimpiya Stadionudur. Forumun mövzusu "Hər kəs üçün yaşayış yerləri: təhlükəsiz, dayanıqlı şəhərlər və yaşayış məskənləri"dir. Dövlət rəsmiləri, beynəlxalq təşkilatların üzvləri və memarlıq və şəhərsalma üzrə ekspertlər bu forumda iştirak edəcəklər.[4]
İlk dəfə olaraq, Ümumdünya Şəhərsalma Forumu Liderlər Sammiti formatında keçiriləcək. 2026-cı ilin martında təsdiqlənmişdir ki, Şavkat Mirziyoyev Liderlər Sammitində iştirak edəcək.[5][6] Çin elan etmişdir ki, 13-cü Ümumdünya Şəhərsalma Forumunda fəal iştirak edəcək.[7]
Forum Bakıda təşkil edilsə də, Qarabağ və Şərqi Zəngəzur iqtisadi rayonlarına forum iştirakçılarının səfərləri təşkil ediləcək. Çünki Azərbaycan Böyük Qayıdış çərçivəsində gördüyü işləri forum iştirakçıları ilə bölüşmək istəyir.[8]
- ↑ ""Azərbaycan Respublikası Hökuməti ilə Birləşmiş Millətlər Təşkilatı arasında Ümumdünya Şəhərsalma Forumunun On Üçüncü Sessiyasının 2026-cı ildə Bakı şəhərində keçirilməsi üçün Ev Sahibi Ölkəyə dair Saziş"in təsdiq edilməsi haqqında Azərbaycan Respublikasının Qanunu". İstifadə tarixi: 16 mart 2026.
- ↑ "Birləşmiş Millətlər Təşkilatının Ümumdünya Şəhərsalma Forumunun 2026-cı ildə Bakı şəhərində keçiriləcək On Üçüncü sessiyasının (WUF13) milli koordinatorunun təyin edilməsi haqqında Azərbaycan Respublikası Prezidentinin Sərəncamı". İstifadə tarixi: 16 mart 2026.
- ↑ "Prezident İlham Əliyev Ümumdünya Şəhərsalma Forumunun On Üçüncü sessiyasının (WUF13) keçirilməsi ilə əlaqədar Təşkilat Komitəsinin yaradılması haqqında Sərəncam imzalayıb". İstifadə tarixi: 16 mart 2026.
- ↑ "Bakı Ümumdünya Şəhərsalma Forumunun XIII Sessiyasına ev sahibliyi edəcək". İstifadə tarixi: 16 mart 2026.
- ↑ "Nazir müavini: Ümumdünya Şəhərsalma Forumu Liderlər Sammiti formatında keçiriləcək VİDEO". İstifadə tarixi: 16 mart 2026.
- ↑ "Şavkat Mirziyoyev Bakıda keçiriləcək WUF13-də iştirak edəcək". İstifadə tarixi: 16 mart 2026.
- ↑ "Səfir Lu Mey: Çin Azərbaycanda keçiriləcək beynəlxalq tədbirlərdə fəal iştirak etməyə hazırdır VİDEO". İstifadə tarixi: 16 mart 2026.
- ↑ "WUF13 çərçivəsində qonaqların Qarabağa səfəri nəzərdə tutulub". İstifadə tarixi: 16 mart 2026.