Çucohime (中将姫?), bəzən Hasehime – Yaponiya folklorunda qadın personaj. Fucivara no Toyonorinin qızı olduğu güman olunur. Hekayəsi səbəbilə "Yapon Sindirella" adlandırılır.[1]
Əfsanəyə görə Çucohime İmperator Şomunun hakimiyyətinin 8-ci ilinin 8-ci ayının 8-ci günündə doğulmuşdur. O, Fucivara no Toyonori və onun arvadının qızı idi. Heç cür uşağı olmayan cütlük Kannona müraciət etmiş, Kanon valideynlərdən birinin həyatı qarşılığında onlara uşaq bəxş etmişdir.[1] Çucohimenin 3 və ya 5 yaşı olanda anası ölmüş və atası yenidən evlənmişdir. Cuçohimenin ögey anası ondan nifrət etmiş və ona qəddarlıqla davranmışdır. Cuçohime əla musiqiçi kimi tanınmışdır. 12 yaşı olanda imperatora koto çalması üçün saraya dəvət olunmuşdur. Ögey anası onun əla çıxışından qəzəblənmiş və onu zəhərləməyə çalışmışdır, lakin öz körpə oğlunu öldürmüşdür. Çucohimenin 13 yaşı olanda ölkədə sel fəlakəti başlamış və atası seli dayandırmaq üçün ondan şeir yazmasını istəmişdir. Yazdığı şeirin seli dayandırması ögey anasını daha da qəzəbləndirmiş və xidmətçisinə Cuçohimeni dağa apararaq öldürməsini əmr etmişdir. Lakin xidmətçi onu öldürmək yerinə evində gizlətmiş və ögey anasına öldüyü barədə yalan demişdir. Hekayənin bir versiyasına görə Çucohimenin atası qızını dağlarda axtarmış və nəhayət onu tapmışdır. Ögey ana ailəni tərk etmiş, Çucohime gənc bir oğlanla evlənmişdir.[2]
Hekayənin əsas versiyasına görə dünyanın faniliyindən narazı olan Çucohime buddist monastırına daxil olmuş, Budda Amida üçün meditasiya edərək anasının reinkarnasiyası kimi Qərbin Təmiz torpağında yenidən doğulmağı arzulamışdır. Münzəvi həyatının son dövründə Amida rahibə cildində qarşısında peyda olmuşdur. Bu hadisədən sonra Çucohime bir gecə içərisində 5 rəngdən ibarət olan paltar toxumuşdur. Paltarın üzərisində Təmiz torpağı kosmoqrafiyası olan Tayma mandalanın təsviri yer alırdı. Çucohime Tayma mandala ilə əlaqə quran ilk şəxs kimi qəbul olunur.[1]
Çucohimenin hekayəsi bir çox əsərin mövzusunu təşkil etmişdir. XIII–XIV əsrlərdə yaşamış no dramaturqu Zemay bu nağıl əsasında iki tamaşa yazmışdır: "Hibariyama" və "Taema". Hibariya iki aktdan ibarət no tamaşasıdır. Birinci aktda Toyonori öz qızı olan Çucohimenin öldürülməsini əmr edir. Xidmətçisi onu Hibari dağına aparsa da, öldürə bilmir, onu bir daxmaya gətirib bir baxıcıya tapşırır. İkinci aktda Toyonori Hibari dağının ətrafında ovçuluq edərkən qızının sağ olduğunu öyrənir və ona qovuşur. Bu tamaşada hekayənin dini tərəfi yer almamışdır. "Taema" isə hekayənin dini aspektindən bəhs edən tamaşadır.[3]
- ↑ 1 2 3 Ashkenazi. səh. 129
- ↑ Roberts. səh. 47
- ↑ Grotenhuis, Elizabeth Ten. Chūjōhime: The Weaving of Her Legend // Flowing Traces: Buddhism in the Literary and Visual Arts of Japan (ingiliscə). Princeton University Press. 1992. 180–200. doi:10.2307/j.ctt7zvz8q. ISBN 978-0-691-63267-4. JSTOR j.ctt7zvz8q. 2017-05-27 tarixində arxivləşdirilib. İstifadə tarixi: 4 fevral 2025.
- Ashkenazi, Michael. Handbook of Japanese Mythology (ingiliscə). ABC-Clio. 2003. səh. 129-130. ISBN 1-57607-467-6. İstifadə tarixi: 4 fevral 2025.
- Roberts, Jeremy. Japanese Mythology from A to Z (ingiliscə). Chelsea House. 2010. ISBN 978-1-4381-2802-3. İstifadə tarixi: 4 fevral 2025.