Çələbi İsmayıl Paşa

Çələbi İsmayıl Paşa (ö. dekabr 1702) — Osmanlı sultanı IV Mehmed, II Süleyman, II Əhməd və II Mustafanın dönəmində müxtəlif vəzifələrdə xidmət etmiş dövlət xadimi.

Əsli və doğum tarixi məlum deyil. Yeniçəri ocağında yetişmiş, ardından 1684-cü ildə Köstəndil sancaqbəyi, 1685-ci ildə isə Rumeli bəylərbəyi oldu. Bir müddət əsirlikdə qalmış, fidyə qarşılığı geri alındıqdan sonra Sayda valisi olmuşdur. 1690-cı ildə Konya, 1691-ci ildə Anadolu bəylərbəyi və İstanbul naibi olmuşdur. 1692-ci ildə Şam, 1694-cü ildə Krit, 1695-ci ildə Misir, 1697-ci ilin oktyabrında Bağdada təyin olundu. 1698-ci ilin oktyabrında Səfəvilərin Kərbəlanı işğal etməsinin ardından 1699-cu ilin mayında Van bəylərbəyi oldu və bu ünvanla Səfəvilərin üzərinə göndərildi. Ancaq 1701-ci ilin yanvarında Səfəvilərə təslim olub onlara sığındı. 1702-ci ilin dekabrında İsfahanda vəfat etdi.