"Yuxarı Vəng" Su Elektrik Stansiyası

“Yuxarı Vəng” Su Elektrik Stansiyasının layihəsi “AzərEnerji” ASC-nin Energetika İnstitutu tərəfindən hazırlanmış, işlərdə yerli mütəxəssislərlə yanaşı, Avstriya və İtaliya şirkətlərinin mütəxəssisləri də iştirak etmişdir.^[1]

Stansiyanın açılış mərasimi 2024-cü il sentyabrın 2-də keçirilmişdir. Açılış mərasimində Azərbaycan Respublikasının Prezidenti İlham Əliyev və birinci xanım Mehriban Əliyeva iştirak etmişdir.^[2]

Stansiyanın qoyuluş gücü 22,5 meqavatdır və bu, ümumi gücü 40 meqavat təşkil edən “Kəlbəcər” su elektrik stansiyaları silsiləsinin tərkib hissəsidir. “Yuxarı Vəng” SES-də il ərzində 66 milyon kilovat-saatadək yaşıl enerji istehsal olunması nəzərdə tutulur ki, bu da təxminən 15 milyon kubmetr təbii qaza qənaət etməyə və 27 min tondan çox karbon emissiyasının qarşısının alınmasına imkan verir.^[2]

Stansiyaya su iki mənbədən daxil olur: “Nadirxanlı” SES-in çıxışından və Tutqu çayı üzərində inşa edilmiş baş suqəbuledici qurğudan. Obyektdə 110 kilovoltluq açıq paylayıcı qurğu və 24 damarlı optik kabel xətti çəkilmişdir. Bu qurğu vasitəsilə stansiya mərkəzləşdirilmiş SCADA sisteminə inteqrasiya olunmuş, müasir rəqəmsal idarəetmə və kibertəhlükəsizlik tədbirləri tətbiq edilmişdir.^[2]

Layihə çərçivəsində tikinti-quraşdırma işləri zamanı ətraf mühit amilləri nəzərə alınmışdır. Çay balıqlarının derivasiya borusuna daxil olmasının qarşısını almaq və onların çay ekosistemində saxlanılmasını təmin etmək üçün xüsusi hidrotexniki qurğular layihələndirilərək quraşdırılmışdır. SES müasir avadanlıqla təchiz edilmişdir.^[1]