Yavalılar (ind. Suku Jawa, yav. Wong Jawa) — İndoneziyada böyük millətlərdən biri. Əsasən Yava adasında, həmçinin Sumatra, Kalimantan adalarının sahil rayonlarında yaşayırlar. Malayziya, Sinqapur, Surinam və sairə ölkələrdə də yavalılar var. Sayları 100 milyondan artıqdır (İndoneziyada təqribən 95.2 milyon nəfər; 2010). Yava dilində danışırlar. Dindarlarının əksəriyyəti müsəlmandır, xristianları da var; islama qədərki dini etiqad qalıqları da qalmışdır. Bəzən səhvən Yava adasının bütün yerli əhalisinə "yavalılar" deyilir. 1-31 may, 2010-cu il siyahıyaalınmasına əsasən İndoneziya əhalisi 237.641.326 nəfər, onlardan İndoneziya vətəndaşları 236.728.379 nəfər, İndoneziya vətəndaşlarından 95.217.022 nəfəri və ya 40.22%-i isə etnik yavalılar olmuşdur. Siyahıyaalınmaya əsasən yavalıların 75.732.945 nəfəri və ya 79.54%-i Yava adasında (Banten əyalətində 1.657.470 nəfər, Qərbi Yava əyalətində 5.710.652 nəfər, Mərkəzi Yava əyalətində 31.560.859 nəfər, Şərqi Yava əyalətində 30.019.156 nəfər, Xüsusi Paytaxt Dairəsi Cakartada 3.453.453 nəfər, Xüsusi Dairə Yoqyakartada 3.331.355 nəfər olmaqla) məskunlaşmışdı, burada qeydə alınmış 136.610.590 nəfər (Banten əyalətində 10.632.166 nəfər, Qərbi Yava əyalətində 43.053.732 nəfər, Mərkəzi Yava əyalətində 32.382.657 nəfər, Şərqi Yava əyalətində 37.476.757 nəfər, Xüsusi Paytaxt Dairəsi Cakartada 9.607.787 nəfər, Xüsusi Dairə Yoqyakartada 3.457.491 nəfər olmaqla) ümumi əhalinin 55.44%-ini təşkil edirdi.
