Teymur Füzuli oğlu Məmmədov 1993-cü il yanvarın 11-də Rusiyada anadan olub. Atası azərbaycanlı, anası isə qazaxdır. 2006-cı ildə ailəsi ilə birgə Rusiyadan Azərbaycana daimi yaşayış üçün gəlib.

2006-cı ildən idmanla məşğul olur. Teymur Məmmədovun əmisi də bu idman növü ilə məşğul olub və Azərbaycan səviyyəli turnirlərdə bir-sıra uğurlara imza atıb. Şəxsi məşqçisi İlham Əlimzanovdur. Rabitə İdman Klubunun üzvüdür. Kumiri Ədalət Məmmədovdur.

Teymur Məmmədov 2013-cü ildə evlənib. 2015-ci il təvəllüdlü Tamerlan, 2017-ci il təvəllüdlü isə Abbas adında övladları var.

2008-ci il: Yeniyetmələr arasında Avropa çempionluğu

Karyerasının birinci ciddi uğuruna Teymur Məmmədov 2008-ci ilin maylnda imza atdı. Keçmiş Azərbaycan Prezidenti Heydər Əliyevin xatirəsinə hər olunan 15–16 yaşlı idmançılar arasında VI. beynəlxalq turnirdə çıxış edən Teymur Məmmədov bütün rəqibləri üzərində qələbə qazandı və turnirin qalibi oldu. Final görüşündə Teymur Məmmədov Rusiya nümayəndəsi Artyom Aqeyeva 18:15 hesabı ilə qalib gəldi. Bu turnirdə qazanılan qələbə nəticəsində Teymur Məmmədov iyunda Bolqarıstanda baş tutacaq yeniyetmələr arasında Avropa Çempionatında mübarizə aparacaq Azərbaycan yığasının heyətinə cəlb edildi.

Teymur Məmmədov 2008-ci ilin 22–28 iyununda Bolqarıstanın Plovdiv şəhərində baş tutan yeniyetmələr arasında Avropa Çempionatında mübarizə apardı. Turnirin 1/4 final mərhələsində Teymur Məmmədov Ukrayna nümayəndəsi Anatoli Fişiç ilə üz-üzə gəldi. İyunun 25-də gərgin idman mübarizəsi şəraitində baş tutan görüşdə hesab 12:12 olsa da, zərbələrin dəqiqliyinə görə Teymur Məmmədov rəqibi üzərində qələbə qazandı və turnirin yarım-final mərhələsinə vəsiqə qazandı. Finala gedən yolda onun rəqibi Ermənistan nümayəndəsi Poqos Adilbəyyan oldu. İyunun 27-də baş tutan görüşün birinci raundundaca Teymur Məmmədov rəqibi üzərində təmiz qələbə qazandı və yeniyetmələr arasında Avropa Çempionatının final görüşünə vəsiqə qazandı. Həlledici görüşdə onun rəqibi Rusiya nümayəndəsi Artyom Ageyev oldu. İyunun 28-də baş tutan görüşdə Teymur Məmmədov rəqibi üzərində 16:5 hesabı ilə inamlı qələbə qazandı. Bununla da 15 yaşlı Teymur Məmmədov yeniyetmələr arasında Avropa Çempionatının qızıl medalına sahib oldu.

Teymur Məmmədov həmin il də həm də Abbas Ağalarovun xatirəsinə həsr olunan beynəlxalq turnirin qalibi oldu.

2009-cu il: Beynəlxalq turnirlərdə ard-arda qələbələr

Teymur Məmmədov 2009-cu ildə birinci uğuruna apreldə imza atdı. Keçmiş Azərbaycan Prezidenti Heydər Əliyevin xatirəsinə hər olunan VII. beynəlxalq turnirdə çıxış edən Teymur Məmmədov finala gedən yolda bütün rəqibləri üzərində qələbə qazandı. Həlledici görüşdə isə Teymur Məmmədov Özbəkistan nümayəndəsi Mirzəbəy Həsənov üzərində 15:2 hesabı ilə inamlı qələbə qazandı və növbəti dəfə beynəlxalq turnirin qızıl medalına sahib oldu.

Teymur Məmmədov növbəti uğuruna iyulda Kiyev şəhərində baş tutan beynəlxalq turnirdə imza atdı. Turnirin yarım-final mərhələsində məğlub olan Teymur Məmmədov turniri bürünc medalla başa vurdu. Noyabrda isə Teymur Məmmədov Qazaxıstanda baş tutan beynəlxalq turnirin qalibi oldu. Həmin ilin sonunda Teymur Məmmədov Abbas Ağalarovun xatirəsinə həsr olunan yeniyetmələr arasında beynəlxalq turnirin final görüşündə 8 əvvəl qalib gəldiyi Özbəkistan nümayəndəsi Mirzəbəy Həsənov üzərində 10:0 hesabı ilə inamlı qələbə qazanaraq qalibi oldu.

2010-cu il: Azərbaycan çempionluğu

Karyerasında seniorlar arasında birinci ciddi uğura Teymur Məmmədov 2010-cu ilin yanvarında imza atdı. Azərbaycan Çempionatında mübarizə aparan 17 yaşlı Teymur Məmmədov finala gedən yolda bütün rəqibləri üzərində qələbə qazandı. Həlledici görüşdə isə Teymur Məmmədov Dmitri Əbülfətov üzərində 10:2 hesabı ilə inamlı qələbə qazandı və Azərbaycan Çempionatının qalibi oldu. Həmin ilin fevralında dönəmin Azərbaycan Milli Olimpiya Komitəsinin Baş Katibi Ağacan Abıyev müsahibəsində 17 yaşında Azərbaycan çempionu adını qazanan Teymur Məmmədovun istedadlı idmançı olduğunu, gələcəyinin parlaq olacağına ümid elədiyini bildirdi.

Teymur Məmmədovun növbəti turniri 2–7 martda Azərbaycanda baş tutan yeniyetmələr arasında Great Silc Way beynəxalq turniri oldu. Turnirin finalına qədər bütünc rəqibləri üzərində qələbə qazanan Teymur Məmmədov həlledii görüşdə Türkiyə nümayəndəsi Burah Aqşina məğlub oldu. Gərgin idman mübarizəsi şəraitində baş tutan görüş 4:4 hesabı ilə başa çatsa da, zərbələrin dəqiqliyinə görə rəqib qalib gəldi, Teymur Məmmədov isə gümüş medalın sahibi oldu.

2010-cu ildə Teymur Məmmədovun birinci ciddi sınağı 25 aprel-4 mayda Azərbaycanda baş tutan yeniyetmələr arasında Dünya Çempionatı oldu. Həmin turnir həm də avqustda Sinqapurda baş tutacaq Yeniyetmələrin I Yay Olimpiya Oyunlarına lisenziya verirdi. Turnirin 1/16 final mərhələsi çərçivəsində baş tutan birinci görüşündə Teymur Məmmədovun rəqibi Braziliya nümayəndəsi Tiaqo Lima idi. Aprelin 26-da baş tutan görüşdə Teymur Məmmədov rəqibi üzərində 2-ci raundda təmiz qələbə qazandı və turnirin 1/8 final mərhələsinə adladı. Bu mərhələdə onun rəqibi Çin nümayəndəsi Yan Alin oldu. Aprelin 28-də baş tutan görüşdə Teymur Məmmədov rəqibi üzərində 10:2 hesabı ilə inamlı qələbə qazandı. Bununla da Teymur Məmmədov turnirin 1/4 final mərhələsinə adladı. Bu mərhələyə qədər inamlı qələbələr qazanan Teymur Məmmədovun bu mərhələdə rəqibi martda beynəlxalq turnirin final görüşündə məğlub olduğu Türkiyə nümayəndəsi Burah Aqşin oldu. Bu səfər Teymur Məmmədov rəqibindən revanş almaq istəsə də, buna nail ola bilmədi. Rəqibinə 1:5 hesabı ilə məğlub olan Teymur Məmmədov yeniyetmələr arasında Dünya Çempionatını beşinci pillədə başa vurdu.

Bu uğursuzluqdan sonra Teymur Məmmədov birinci uğuruna sentyabrda Azərbaycan Kubojunun qalibi olmaqla imza atdı. İlin sonunda isə Teymur Məmmədov Azərbaycan Çempionatında mübarizə apardı. Finala gedən yolda bütün rəqibləri üzərində qələbə qazanan Teymur Məmmədov həlledici görüşdə Sərxan Cabbarova qalib gəldi və növbəti dəfə Azərbaycan Çempionatının qızıl medalına sahib oldu.Ağacan Abıyev müsahibəsində növbəti dəfə Azərbaycan çempionu adını qazanan Teymur Məmmədovun gələn il Avropa Çempionatında da ümidləri doğrulda biləcəyinə inandığını bildirdi.

2011-ci il: Avropa çempionluğu və Dünya Çempionatında final

2011-ci ildə Teymur Məmmədovun birinci turniri 8–12 fevralda Macarıstanın Debretsen şəhərində baş tutan beynəlxalq turnir oldu. Turnirin 1/4 final mərhələsində Teymur Məmmədov Fransa nümayəndəsi Con M'Bumba ilə üz-üzə gəldi. Fevralın 10-da gərgin idman mübarizəsi şəraitində baş tutan görüşdə Teymur Məmmədov rəqibi üzərində 10:5 hesabı ilə qələbə qazandı və turnirin yarım-final mərhələsinə adladı. Finala gedən yolda onun rəqibi Macarıstan nümayəndəsi Szabolç Del oldu. Fevralın 11-də baş tutan görüşdə Teymur Məmmədov birinci raunddaca rəqibi üzərində təmiz qələbə qazandı və turnirin final görüşünə vəsiqə qazandı. Həlledici görüşdə isə Teymur Məmmədovun rəqibi Polşa nümayəndəsi Mixal Olas oldu. Fevralın 12-də gərgin idman mübarizəsi şəraitində baş tutan final görüşündə Teymur Məmmədov rəqibinə 4:2 hesabı ilə qalib gəldi və beynəlxalq turnirin qızıl medalına sahib oldu.

Teymur Məmmədovun 2011-ci ildə növbəti sınağı 8–12 martda Azərbaycanda baş tutan IV. Great Silc Way beynəxalq turniri oldu. Keçən ili final görüşündə məğlub olaraq turniri gümüş medalla başa vuran Teymur Məmmədov bu səfər çempionluğa iddialı idi. Turnirin 1/4 final mərhələsində Teymur Məmmədov İran nümayəndəsi Omid Babayi ilə üz-üzə gəldi. Martın 10-da baş tutan görüşdə Teymur Məmmədov rəqibi üzərində təmiz qələbə qazandı və turnirin yarım-final mərhələsinə adladı. Finala gedən yolda onun rəqibi digər İran nümayəndəsi Reza Muradxani oldu. Martın 11-də baş tutan görüşdə Teymur Məmmədov rəqibinə 8:4 hesabı ilə qalib gəldi və turnirin final görüşünə vəsiqə qazandı. Həlledici görüşdə isə Teymur Məmmədovun rəqibi Rusiya nümayəndəsi Artur Beterbiyev oldu. Fevralın 12-də baş tutmalı olan final görüşündə rəqib zədə səbəbilə çıxış eləmədi və Teymur Məmmədov beynəlxalq turnirin qızıl medalına sahib oldu.

Həmin ilin mayında isə Teymur Məmmədov Azərbaycan Kubojunda mübarizə apardı. Turnirin son qalibi olan Teymur Məmmədov bu səfər final görüşündə Abdulqədir Abdullayev üzərind 8:2 hesabı ilə inamlı qələbə qazandı və növbəti dəfə turnirin qızıl medalına sahib oldu.

2011-ci ilin birinci nüfuzlu turniri 16–24 iyunda baş tutan Avropa Çempionatı oldu. Həmin turnir 18 yaşlı Teymur Məmmədov üçün Avropa Çempionatlarında debüt idi. Turnirin 1/16 final mərhələsində Teymur Məmmədovun rəqibi Macarıstan nümayəndəsi Cozef Darmos oldu. Cozef Darmos 2008 və 2010-cu illərdə Avropa Çempionatının bürünc medallarına sahib olmuşdu. İyunun 18-də gərgin idman mübarizəsi şəraitində baş tuta görüş 20:20 hesabı ilə başa çatsa da, zərbələrin dəqiqliyinə görə Teymur Məmmədov qələbə qazandı və turnirin 1/8 final mərhələsinə adladı. Bu mərhələdə onun rəqibi Xorvatiya nümayəndəsi Stepan Vuqdeliya oldu. Həmin görüşdə Teymur Məmmədov rəqibi üzərində 24:14 hesabı ilə inamlı qələbə qazandı və turnirin 1/4 final mərhələsinə adladı. Bu mərhələdə onun rəqibi Rusiya nümayəndəsi Abdulhəmid Nurməhəmmədov oldu. Gərgin idman mübarizəsi şəraitində baş tutan görüşdə Teymur Məmmədov rəqibinə 24:22 hesabı ilə qalib gəldi və Avropa Çempionatının yarım-final mərhələsinə adladı. Bununla da Teymur Məmmədov ən azından bürünc medalı özü üçün təmin elədi. Finala gedən yolda onun rəqibi İngiltərə nümayəndəsi Yohan Vit oldu. Həmin görüşdə Teymur Məmmədov rəqibi üzərində 18:12 hesabı ilə qalib gəldi və Avropa Çempionatının final görüşünə vəsiqə qazandı. Həlledici görüşdə onun rəqibi Bolqarıstan nümayəndəsi Tervel Pulev oldu. Tervel Pulev son Avropa Çempionatının finalçısı idi. İyunun 24-də baş tutan görüşün üçüncü raundunda Teymur Məmmədov rəqibi üzərində təmiz qələbə qazandı. Bununla da 18 yaşlı Teymur Məmmədov Avropa Çempionatının qalibi oldu. Teymur Məmmədov həm də 18 ildən sonra Avropa Çempionatının qalibi olan birinci azərbaycanlı oldu (sonuncu dəfə 1993-cü ildə Rövşən Hüseynov bu uğura imza atmışdı). Turnirdən sonra Teymur Məmmədov müsahibəsində əsas hədəfinin Dünya Çempionatı və London Olimpiadası olduğunu bildirdi. Turnirdən sonra dönəmin prezidenti Kəmaləddin Heydərov Avropa çempionları Salman Əlizadə və Teymur Məmmədovla görüşdü, qazandığı qələbələrə görə onlara minnətdarlığını bildirdi.

Teymur Məmmədov Azərbaycan yığması ilə birgə Dünya Çempionatından əvvəl İtaliyada təlim-məşq toplanışlarında oldu. Turnirdən əvvəl Teymur Məmmədov müsahibəsində əsas həfədinin olimpiya lisenziyasına sahib olmaq olduğunu bildirdi. Avqust ayında AIBA tərəfindən açıqlanan reytinq cədvəlinə əsasən Teymur Məmmədov üçüncü pillədə qərarlaşdı.

Sentyabrın 21-də Dünya Çempionatında mübarizə aparacaq Azərbaycan yığmasının heyəti açıqlandı. Komandanın ən gənc üzvü 18 yaşlı Teymur Məmmədov idi. Teymur Məmmədov müsahibəsində əsas rəqibinin Dünya və Avropa Çempionatının qalibi, Rusiya nümayəndəsi Artur Beterbiyev olduğuu bildirdi.Heydər Əliyev adına İdman Arenasında (o dövrdə adı Heydər Əliyev adına İKK idi) baş tutan və sentyabrın 26-da start götürən Dünya Çempionatında Teymur Məmmədov təsnifat mərhələsindən azad idi. Teymur Məmmədov Azərbaycan yığmasının əsas medal ümidi hesab olunurdu. Teymur Məmmədov turnirin 1/16 final mərhələsində Barbados nümayəndəsi Anderson Emmanuel ilə üz-üzə gəldi. Həmin görüşdə Teymur Məmmədov rəqibi üzərində 24:8 hesabı ilə inamlı qələbə qazandı və Dünya Çempionatının 1/8 final mərhələsinə adladı. Bu mərhələdə isə onun rəqibi Macarıstan nümayəndəsi Cozef Darmos oldu. Teymur Məmmədov Cozef Darmosa iyunda baş tutan Avropa Çempionatında qalib gəlmişdi. Bu səfərdə Teymur Məmmədov görüşdə üstün tərəf oldu. Rəqibi üzərində 24:10 hesabı ilə inamlı qələbə qazanan Teymur Məmmədov turnirin 1/4 final mərhələsinə adladı. Bununla da Teymyr Məmmədov olimpiya lisenziyasını təmin elədi. Dünya Çempionatının 1/4 final mərhələsində Teymur Məmmədov Kuba nümayəndəsi Xose Lardut ilə üz-üzə gəldi. Gərgin idman mübarizəsi şəraitində baş tutan görüşdə Teymur Məmmədov rəqibi üzərində 24:40 hesabı ilə qələbə qazandı və Dünya Çempionatının yarım-final mərhələsinə adladı. Finala gedən yolda Teymur Məmmədovun rəqibi Çin nümayəndəsi Van Yuanyuan oldu. Bu görüşdə Teymur Məmmədov rəqibi üzərində inamlı qələbə qazandı. Görüşün birinci raundunda hesab 4:2 Teymur Məmmədovun xeyrinə olanda rəqib referilərdən görüşü dayandırmağı xahiş elədi. Bununla da Teymur Məmmədov qalib elan edildi və Dünya Çempionatının final görüşünə vəsiqə qazandı. Görüşdən sonra Teymur Məmmədov müsahibəsində məqsədinin Azərbaycanın yeni Dünya çempionu olması olduğunu bildirdi Bu idman növü üzrə Dünya Çempionatının qalibi olan cəmi bir azərbaycanlı var — 2003-cü ildə Ağası Məmmədovdur. Həlledici görüşdə onun rəqibi Ukrayna nümayəndəsi Olesandr Usi oldu. Görüşdən əvvəl müsahibəsində Teymur Məmmədov rəqibin güclü olduğunu, amma qələbə üçün əlindən gələn hər şeyi edəcəyini bildirdi. Bununla belə final görüşü Teymur Məmmədov üçün uğursuz oldu. Teymur Məmmədov rəqibinə 15:25 hesabı ilə məğlub oldu və Dünya Çempionatının gümüş medalına sahib oldu.

Noyabr ayında AIBA tərəfindən açıqlanan reytinq cədvəlinə əsasən Teymur Məmmədov birinci pillədə qərarlaşdı. Azerisport.com idman portalının və Gənclər və İdman Nazirliyinin versiyasına görə Teymur Məmmədov 2011-ci ilin ən yaxşı on idmançısından biri seçildi. Həmçinin Azərbaycan Prezidenti İlham Əliyev tərəfindən Teymur Məmmədova yeni mənzilin orderi təqdim edildi.

2012-ci il: London Olimpiadasında bürünc medal

2012-ci il yanvarın 5-də Teymur Məmmədov WSB-də çıxış edən BAKU Firesin heyətinə cəlb edildi. Bu hadisəni dönəmin Azərbaycan Milli Olimpiya Komitəsinin Baş Katibi Ağacan Abıyev sərt formada tənqid elədi və olimpiada ilində bu transferi uğursuz addım olaraq qiymətləndirdi. Martda Teymur Məmmədovun Great Silc Way beynəxalq turnirində mübarizə aparması nəzərdə tutulsa da, o, BAKU Firesin WSB görüşünə görə turnirdə çıxış edə bilmədi. Martın 10-da BAKU Fires WSB çərçivəsində Hindistanı təmsil edən Mumbai Fighters ilə üz-üzə gəldi. Həmin görüşdə Teymur Məmmədov və onun rəqibi arasında baş tutlamlı olan görüş, ehtiyat görüş olaraq təyin edildi (əgər görüş 3:3 hesabı ilə başa çatsa, onda həmin görüş baş tutacaq). Amma nəticədə BAKU Fires rəqibi üzərində 5:0 hesabı ilə qələbə qazandı və Teymur Məmmədovun görüşünə ehtiyac olmalı. Martın 30-da və BAKU Fires nümayəndələri arasında olan danışığa əsasən olimpiada da Azərbaycan yığmasının əsas medal ümidi hesab olunan Məhəmmədrəsul Məcidov və Teymur Məmmədov BAKU Firesin heyətindən çıxarıldı.

Olimpiadadan əvvəl Teymur Məmmədov yanvarda Azərbaycan yığması ilə birgə Birləşmiş Ştatların Mayami şəhərində təlim-məşq toplanışlarında oldu. Apreldə isə Azərbaycan yığması təlim-məşq toplanışlarını Kiyev şəhərində davam elədi.

XXX Yay Olimpiya Oyunları 12 iyul-12 avqustda Birləşmiş Krallıqın London şəhərində baş tutdu. AIBA tərəfindən Teymur Məmmədov olimpiadadan əvvəl Azərbaycan yığmasının əsas medal ümidi olaraq qiymətləndirilirdi. Teymur Məmmədov son Avropa Çempionatının qalibi, son Dünya Çempionatının finalçısı idi. Azərbaycan yığmasının baş məşqçisi müsahibəsində Məhəmmədrəsul Məcidov və Teymur Məmmədovun olimpiya qızılı üçün mübarizə aparacağını bildirdi. Teymur Məmmədov olimpiadanın 1/8 final mərhələsində Avstraliya nümayəndəsi Jey Opetai ilə üz-üzə gəldi. Jey Opetai 2011-ci il gənclər arasında Dünya Çempionatının qalibi idi. Avqustun 1-də baş tutan görüş gərgin idman mübarizəsi şəraitində baş tutdu. Nəticədə Teymur Məmmədov rəqibi üzərində 12:11 hesabı ilə qələbə qazandı və olimpiadanın 1/4 final mərhələsinə adladı. Bu mərhələdə onun rəqibi Belarus nümayəndəsi Sergey Karneyu oldu. Sergey Karneyu son Dünya Çempionatının bürünc medalçısı idi. Avqustun 5-də baş tutan görüş gərgin idman mübarizəsi şəraitində baş tutdu. Nəticədə görüş 20:20 hesabı ilə başa çatsa da, zərbələrin dəqiqliliyinə görə Teymur Məmmədov qalib elan edildi. Bununla da Teymur Məmmədov olimpiadanın yarım-final mərhələsinə adladı və ən azından bürünc medalı özü üçün təmin elədi. Görüşdən sonra müsahibəsində Teymur Məmmədov medalı təmin eləsə belə London Olimpiadasında performansını aşağı qiymətləndirdi. Finala gedən yolda onun rəqibi İtaliya nümayəndəsi Klemente Russo oldu. Klemente Russo son olimpiadanın finalçısı, həmçinin Dünya və Avropa Çempionatlarının qalibi idi. Görüşdən əvvəl həm Məmmədovun, həm də Russonun görüşün favoriti olduğunu, buna görə də görüşün çətin olacağını bildirdi. Avqustun 10-da baş tutan görüş gərgin idman mübarizəsi şəraitində baş tutdu. Görüşün birinci hissəsi gərfin idman mübarizəsi şəraitində baş tutdu. Həm Məmmədov, həm də Russo dəqiq zərbələrlə çıxış elədi, nəticədə isə Teymur Məmmədov birinci raundu 3:2 hesabı ilə qalib başa vurdu. Növbəti hissədə də Teymur Məmmədov qələbə qazandı. Rəqibinə 6:4 hesabı ilə qalib gələn Teymur Məmmədov ümumi nəticədə hesabı 9:6 elədi və üstünlüyünə davam elədi. Üçüncü hiddə də isə həm Məmmədov, həm də Russo inamlı mübarizə aparmadı. Nəticə isə gözlənilməz oldu və referilər Klemente Russonun bu hissədə 9:5 hesabı ilə qələbə qazandığını bildirdi. Bununla da ümumi nəticədə Teymur Məmmədov rəqibinə 14:15 hesabı ilə məğlub oldu. Bu məğlubiyyət Azərbaycan yığmasının məşqçiləri tərəfindən birmənalı qarşılanmadı. Teymur Məmmədov müsahibəsində qərarı ədalətsiz adlandırdı və özünün güclü olduğunu bildirdi. Bununla da Teymur Məmmədov London Olimpiadasının bürünc medalına sahib oldu.

Azərbaycan Prezidenti İlham Əliyevin 31 avqust 2012-ci il tarixli 2399 nömrəli Sərəncamına əsasən XXX Yay Olimpiya Oyunlarında qazandığı nailiyyətlərə və Azərbaycan idmanında xidmətlərinə görə Teymur Füzuli oğlu Məmmədov "Tərəqqi" medalı ilə təltif edildi.

Olimpiadadan sonra Teymur Məmmədov 12–18 noyabrda Azərbaycanda baş tutan tələbələr arasında Dünya Çempionatında mübarizə apardı. Turnirin yarım-final mərhələsində Teymur Məmmədov Rusiya nümayəndəsi Şiqabudin Əliyev ilə üz-üzə gəldi. Həmin görüş zamanı Teymur Məmmədov idmançı yaraşmayan addımlar ardığına görə turnirdən uzaqlaşdırıldı.

2012-ci ilin nəticələrinə əsasən Teymur Məmmədov Gənclər və İdman Nazirliyi tərəfindən ilin ən yaxşı on idmançısından biri seçildi.

2013-cü il: Dünya və Avropa Çempionatlarında medallar

Teymur Məmmədovun 2013-cü ildə birinci turniri yanvarda baş tutan Azərbaycan Çempionatı oldu. Finala gedən yolda bütün rəqiblərinə qalib gələn Teymur Məmmədov həlledici görüşdə Abdulqədir Abdullayev üzərində 20:15 hesabı ilə qələbə qazandı. Bununla da Teymur Məmmədov üçüncü dəfə Azərbaycan Çempionatının qalibi oldu.

Həmin ilin martında VI. Great Silc Way beynəxalq turniri baş tutdu. Əvvəldən həmin turnirdə Teymur Məmmədovun çıxış eləməsi nəzərdə tutulsa da, əlindən zədə aldığına görə o, turirdə mübarizə apara bilmədi.

Teymur Məmmədov zədəli olsa da, martın sonlarında Xerson şəhərində baş tutan beynəlxalq turnirdə çıxış elədi. Turnirin birinci görüşündəcə Teymur Məmmədov Özbəkistan nümayəndəsi Rüstəm Tulaqanova 8:15 hesabı ilə məğlub oldu və turnirdə mübarizəsini başa vurdu.

2013-cü ilin birinci nüfuzlu turniri 1–8 iyunda Belarusda baş tutan 40-cı Avropa Çempionatı oldu. Komandanın heyətinə zədə tamam sağalan Teymur Məmmədov da cəlb edildi. Təsnifat mərhələsidən azad olan son Avropa çempionu Teymur Məmmədov çempionata 1/8 final mərhələsindən başladı. Bu mərhələdə onun rəqibi Xorvatiya nümayəndəsi Maro Çaliç oldu. İyunun 4-də baş tutan həmin görüşdə Teymur Məmmədov rəqibi üzərində 3:0 hesabı ilə qələbə qazandı. Bununla da Teymur Məmmədov turnirin 1/4 final mərhələsinə adladı. Bu mərhələdə onun rəqibi İrlandiya nümayəndəsi Tommi Karti oldu. İyunun 5-də görüşdə də Teymur Məmmədov rəqibi üzərində 3:0 hesabı ilə qələbə qazandı və Avropa Çempionatının yarım-final mərhələsinə adladı. Finala gedən yolda onun rəqibi Ukrayna nümayəndəsi Denis Poyatsiya oldu. İyunun 6-da baş tutan görüşdə Teymur Məmmədov qələbə qazandı (3:0) və növbəti dəfə Avropa Çempionatının final görüşünə vəsiqə qazandı. Həlledici görüşdə onun rəqibi Rusiya nümayəndəsi Alexey Yeqorov oldu. İyunun 8-də baş tutan görüşdə Teymur Məmmədov rəqibinə məğlub oldu və Avropa Çempionatının gümüş medalına sahib oldu. Final görüşündən sonra Teymur Məmmədov finalda qələbə qazana bilməməsini birinci görüşdəcə barmağının sınması ilə əlaqələndirdi. Azərbaycan yığmasının baş məşqçisi də müsahibəsində Teymur Məmmədovun çempion ola bilməməsini həm birinci görüşdə barmağından aldığı zədə, həm də ilin əvvəlində əlindən aldığı zədə ilə əlaqələndirdi.

2013-cü ilin əsas turniri isə Qazaxıstanın Almatı şəhərində baş tutan Dünya Çempionatı oldu. AIBA tərəfindən turnirdən əvvəl açıqlanan reytinq cədvəlinə əsasən Teymur Məmmədov birinci pillədə qərarlaşmışdı. Son Dünya Çempionatının finalçısı Teymur Məmmədov bu səfər çempionluğa iddialı idi. Təsnifat mərhələsindən azad olan Teymur Məmmədov çempionata 1/16 final mərhələsində başladı. Bu mərhələdə onun rəqibi Nigeriya nümayəndəsi Efetobor Apoçi oldu. Həmin görüşdə Teymur Məmmədov rəqibi üzərində 3:0 hesabı ilə qələbə qazandı və turnirin 1/8 final mərhələsinə adladı. Bu mərhələdə onun rəqibi əslən Hindistanlı olan, amma AIBA bayrağı altında çıxış edən Manpri Sinq oldu. Bu görüşdə də Teymur Məmmədov rəqibi üzərində 3:0 hesabı ilə qələbə qazandı və Dünya Çempionatının 1/4 final mərhələsinə adladı. Bu mərhələdə isə onun rəqibi Kuba nümayəndəsi Erislandi Savon oldu. Gərgin idman mübarizəsi şəraitində baş tutan görüşdə Teymur Məmmədov rəqibinə 2:1 hesabı ilə qalib gəldi və Dünya Çempionatının yarım-final mərhələsinə adladı. Finala gedən yolda onun rəqibi ötən il London Olimpiadasında məğlub olduğu İtaliya nümayəndəsi Klemento Russo oldu. Görüşdən əvvəl Teymur Məmmədov müsahibəsində rəqibdən revanş alacağını bildirdi. Amma həmin görüşdə Teymur Məmmədov zəif mübarizə apardı və nəticədə rəqibinə 0:3 hesabı ilə məğlub oldu. Bununla da Teymur Məmmədov Dünya Çempionatının bürünc medalına sahib oldu. Teymur Məmmədov müsahibəsində çempionata əla start verdiyini, amma finala çatmağa gücünün olmadığını bildirdi.

2013-cü ilin nəticələrinə əsasən Avropa Çempionatı gümüş, Dünya Çempionatını isə bürünc meadlla başa vuran Teymur Məmmədov Gənclər və İdman Nazirliyinin versiyasına görə ilin ən yaxşı on idmançısından biri seçildi.

2014-cü il: WSB-də mövsüm

2013-cü ildə WSB-də çıxış edən BAKU Fires transfer pəncərəsi çərçivəsində Teymur Məmmədovu heyətinə cəlb eləməyə çalışsa da, o, bundan imtina elədi və bütün diqqətinin 2015-ci ildə baş tutacaq Avropa Oyunları və Dünya Çempionatına yönəldiyini bildirdi. Amma 2014-cü ilin yanvarında BAKU Firesin baş meneceri Rizvan Gənciyev Teymur Məmmədovun il ərzində heç bir nüfuzlu beynəlxalq turnir olmadığına görə WSB-də çıxış eləməsi barədə xahişi olduğunu bildirdi və o, heyətə cəlb edildi.

2014-cü il fevralın 8-də WSB-nin qrup mərhələsinin 8-ci turu çərçivəsində BAKU Fires Polşanı təmsil edə Hussars Poland ilə üz-üzə gəldi.Qubada baş tutan görüşdə Teymur Məmmədov Pyotr Podluçi üzərində inamlı qələbə qazandı.BAKU Fires isə ümumi nəticədə rəqibinə 5:0 hesabı ilə qalib gəldi. Komandanın baş meneceri Rizvan Gənciyev müsahibəsində Teymur Məmmədovun birinci raunddaca məsələni vaxtından əvvəl həll edə biləcəyini, amma ondan görüşü beş raund aparmasını xahiş elədiyini bildirdi.

Fevralın 28-də isə BAKU Fires səfərdə Kubanı təmsil edən Cuba Domaderos ilə üz-üzə gəldi. Həmin görüşdə Teymur Məmmədov 91 Kq.-da yox, 81 Kq.-da çıxış elədi. Teymur Məmmədovun rəqibi Xulio Sezar idi. Nəticədə Teymur Məmmədov rəqibinə məğlub oldu. Ümumi olaraq BAKU Firesda rəqibinə 2:3 hesabı ilə məğlub oldu.

Aprelin 6-da WSB-in 1/4 final mərhələsinin cavab görüşləri baş tutdu. Komandanın rəqibi İtaliyanı təmsil edən Dolce & Gabbana Italia Thunder idi. Azərbaycanda baş tutan birinci görüşdə meydan sahibləri 5:0 hesabı ilə qalib gəlmişdi. Bu görüşdə isə Azərbaycan təmsilçisinə cəmi bir qələbə lazım idi. Teymur Məmmədov rəqibi Abdelhalid Banşablaya məğlub oldu. Son olaraq çıxış edən Aslanbəy Mahmudov isə qələbə qazandı və BAKU Firesi WSB-nin yarım-final mərhələsinə apardı.

Bu mərhələdə BAKU Fires Qazaxıstanı təmsil edən Astana Arlans ilə üz-üzə gəldi. Birinci görüşdə Astana Arlans rəqibinə 3:2 hesabı ilə qalib gəldi. Teymur Məmmədov bu görüşdə ehtiyac (altıncı görüşdə mübarizə aparan) idmançı oldu.Astana Arlansın baş məqşçisi Behbud Esjanov müsahibəsində Teymur Məmmədovu ciddi rəqib olaraq görmədiyini bildirdi. Komandanın baş meneceri Rizvan Gənciyev lazım gələrsə altıncı görüşdüə Teymur Məmmədovun işi həll edəcəyini bildirdi. Mayın 3-də Qubada baş tutan görüşdə BAKU Fires rəqibi üzərində 4:1 hesabı ilə qələbə qazandı və WSB-in final görüşünə vəsiqə qazandı. Görüşün taleyi beş görüşdə həll olunduğuna görə Teymur Məmmədovun çıxış eləməsinə ehtiyac olmadı.

WSB-in final görüşündə isə BAKU Fires qrup mərhələsində məğlub olduğu Kuba nümayəndəsi Cuba Domadores ilə üz-üzə gəldi. Teymur Məmmədovun çıxış eləmədiyi fianl görüşündə Azərbaycan təmsilçisi məğlub oldu və WSB-ni bürünc medalla başa vurdu. Mövsümün sonunda BAKU Fires Teymur Məmmədovla yollarını ayırdı. Komandanın baş meneceri bunun səbəbini Teymur Məmmədovun gücünün beş raunda çata bilmədiyini, bunun özü üçündə ciddi problem ola biləcəyini bildirdi.

WSB mövsümü başa çatandan sonra Teymur Məmmədov Azərbaycan Kuboju turnirinə hazırlaşdı. Finala qədər bütün rəqibləri üzərində qələbə qazanan Teymur Məmmədov həlledici görüşdə Abdulqədir Abdullayeva məğlub oldu və turniri gümüş medalla başa vurdu.

28–30 noyabrda isə Teymur Məmmədov Serbiyada baş tutan beynəlxalq turnirdə mübarizə apardı. Turnirin yarım-final mərhələsində İsveç nümayəndəsi Qabriel Riçardsa 3:0 hesabı ilə qalib gələn Teymur Məmmədov final görüşündə Ukrayna nümayəndəsi İvan Yuxta üzərində 2:1 hesabı ilə qələbə qazandı və turnirin qalibi oldu.

2015-ci il: Avropa Oyunlarında zəfər

2015-ci ilin yanvarında Teymur Məmmədov Şağan qəsəbəsində baş tutan Azərbaycan Çempionatında mübarizə apardı. Finala gedən yolda bütün rəqiblərinə qalib gələn Teymur Məmmədov həlledici görüşdə Rahil Məmmədli ilə üz-üzə gəldi. Həmin görüşdə Teymur Məmmədov rəqibi üzərində qələbə qazandı və üçüncü dəfə Azərbaycan Çempionatını qızıl medalla başa vurdu.

2015-ci ilin əsas turnirlərindən biri 12–28 iyunda Azərbaycanda baş tutacaq I Avropa Oyunları idi. Bu turnirdə mübarizə aparacaq Azərbaycan yığmasının heyəti 15–20 apreldə baş tutan VIII. Great Silc Way beynəlxalq turnirinin nəticələri əsasında məlum oldu. Teymur Məmmədov turnirin 1/4 final mərhələsində Bolqarıstan nümayəndəsi Kristian Dimitrov ilə üz-üz gəldi. Həmin görüşdə Teymur Məmmədov rəqibinə 3:0 hesabı ilə qalib gəldi və turnirin yarım-final mərhələsinə adladı. Bu mərhələdə onun rəqibi Rusiya nümayəndəsi Yevgeni Kobzev oldu. Bu görüşdə də Teymur Məmmədov rəqibi üzərində 3:0 hesabı ilə qələbə qazandı və turnirin final görüşünə vəsiqə qazandı. Həlledici görüşdə onun rəqibi Türkiyə nümayəndəsi Seyda Keser oldu. Final görüşündə də Teymur Məmmədov rəqibi üzərində qələbə qazandı (3:0) və beynəlxalq turnirin qalibi oldu. Turnir zamanı Teymur Məmmədov müsahibəsində əsas hədəfinin Avropa Oyunlarının qalibi olmaq olduğunu bildirdi.

Avropa Oyunlarına Teymur Məmmədov Azərbaycan yığması ilə birgə Mexico şəhərində baş tutan təlim-məşq toplanışlarında hazırlaşdı. İyunun 4-də I Avropa Oyunlarında mübarizə aparacaq Azərbaycan yığmasının heyəti açıqlandı. Azərbaycan yığmasının məşqçiləri Teymur Məmmədovun bu turnirdə −91 Kq.-da yox, −81 Kq.-da çıxış eləməsini məqsədəuyğun hesab elədi.

I Avropa Oyunları 12–28 iyunda Azərbaycanda baş tutdu. Teymur Məmmədovun turnirin təsnifat mərhələsində rəqibi Birləşmiş Krallıq nümayəndəsi Coşua Buatsi oldu. İyunun 18-də baş tutan görüşdə Teymur Məmmədov rəqibi üzərində 3:0 hesabı ilə qələbə qazandı və turnirin 1/8 final mərhələsinə adladı. Görüşdən sonra Teymur Məmmədov müsahibəsində rəqibinin çox güclü olduğunu bildirdi. Bu görüş zamanı Teymur Məmmədov başından zədə aldı. Görüşdən sonra tibbi personalın müayinəsinə əsasən Teymur Məmmədovun 1/8 final mərhələsində mübarizə aparmasına icazə verildi. Bu mərhələdə onun rəqibi Polşa nümayəndəsi Yordan Kulinsi oldu. İyunun 19-da baş tutan görüşdə Teymur Məmmədov rəqibinə 3:0 hesabı ilə qalib gəldi və turnirin 1/4 final mərhələsinə adladı. Bu mərhələdə Teymur Məmmədov Niderland nümayəndəsi Peter Müllenberq ilə üz-üzə gəldi. İyunun 22-də Teymur Məmmədov rəqibi üzərində 3:0 hesabı ilə qələbə qazandı və I Avropa Oyunlarının yarım-final mərhələsinə adladı. Bununla da Teymur Məmmədov ən azından bürünc medalı təmin elədi. Görüşdən sonra Teymur Məmmədov müsahibəsində rəqibin güclü olduğunu və görüşün çətin alındığını bildirdi. Finala gedən yolda onun rəqibi Rusiya nümayəndəsi Pavel Silyaqin oldu. İyunun 24-də baş tutan görüşdə Teymur Məmmədov rəqibinə qalib gəldi (3:0) və I Avropa Oyunlarının final görüşünə vəsiqə qazandı. Həlledici görüşdə onun rəqibi İtaliya nümayədəsi Valentino Manfredoniya oldu. İyunun 25-də Kristal Zalında baş tutan görüşü Azərbaycan Prezidenti İlham Əliyev birbaşa zaldan izlədi. Həmin görüşdə Teymur Məmmədov rəqibi üzərində 3:0 hesabı ilə qələbə qazandı və I Avropa Oyunlarının qalibi oldu. Təltifetmə mərasimi zamanı Teymur Məmmədova qızıl medalı Azərbaycan Prezidenti İlham Əliyev təqdim elədi. Görüşdən sonra müsahibəsində Teymur Məmmədov qələsəbini bir neçə ay sonra doğulacaq oğluna həsr elədiyini bildirdi.I Avropa Oyunlarının iyunun 28-də Olimpiya Stadionunda baş tutan rəsmi bağlanış mərasimi zamanı Azərbaycan bayrağını Teymur Məmmədov apardı.

Azərbaycan Prezidenti İlham Əliyevin 29 iyun 2015-ci il tarixli 1299 nömrəli Sərəncamına əsasən I Avropa Oyunlarında qazandığı nailiyyətlərə və Azərbaycan idmanında xidmətlərinə görə Teymur Füzuli oğlu Məmmədov "Şöhrət" ordeni ilə təltif edildi.

Avropa Oyunlarının nəticələrinə əsasən Teymur Məmmədov Qətərin Doha şəhərində baş tutacaq Dünya Çempionatına lisenziyaya sahib oldu. Turnirdən əvvəl Teymur Məmmədov Azərbaycan yığması ilə birgə avqustda Mexico şəhərində təlim-məşq toplanışlarında oldu. Sentyabrda isə Azərbaycan yığması Dünya Çempionatı hazırlığın əsas mərhələsi üçün İtaliyada təlim-məşq toplanışlarında oldu.

2015-ci ilin əsas turniri Qətərin Doha şəhərində baş tutan Dünya Çempionatı oldu. Karyerası ərzində üçüncü dəfə Dünya Çempionatında çıxış edən Teymur Məmmədov bu səfər də medala iddialı idi. Çempionatın açılış mərasimində Azərbaycan bayrağını da məhz Teymur Məmmədov apardı. Təsnifat mərhələsindən azad olan Teymur Məmmədov turnirin 1/8 final mərhələsində Rusiya nümayəndəsi Pavel Silyaqin ilə üz-üzə gəldi. İyunda Avropa Oyunlarının yarım-final mərhələsində qalib gəldiyi rəqibinə Teymur Məmmədov bu səfər məğlub oldu (0:3) və Dünya Çempionatında mübarizəsini dayandırdı. Dünya Çempionatının sonra Teymur Məmmədov Azərbaycan yığması ilə birgə Rabat şəhərində təlim-məşq toplanışlarında oldu.

2016-cı il: Rio-de-Janeyro Olimpiadasında uğursuzluq

Teymur Məmmədovun 2016-cı ildə birinci turniri fevralda Macarıstanın Debretsen şəhərində baş tutan beynəlxalq turnir oldu. Turnirin yarım-final mərhələsində məğlub olan Teymur Məmmədov turniri bürünc medalla başa vurdu. Daha sonra Teymur Məmmədov Azərbaycan yığması ilə birgə Birləşmiş Ştatların Kolorado ştatında təlim-məşq toplanışlarında oldu. AIBA tərəfindən mart ayında açıqlanan reytinq cədvəlində Teymur Məmmədov onuncu pillədə qərarlaşmışdı.

Martda Teymur Məmmədov IX. Great Silc Way beynəlxalq turnirində mübarizə apardı. Turnirdə bütün rəqibləri üzərində qələbə qazanan Teymur Məmmədov qızıl medalın sahibi oldu.

8–18 apreldə Samsun şəhərində Avropa Olimpiya Təsnifat Turniri baş tutdu. Keçən il Doha şəhərində baş tutan Dünya Çempionatında olimpiya lisenziyasına sahib ola bilməyən Teymur Məmmədov bu turnirdə lisenziyanı almağı hədəfləyirdi. Turnirin 1/8 final mərhələsində Teymur Məmmədov Rusiya nümayəndəsi Georgi Kuşitaşvili ilə üz-üzə gəldi. Həmin görüşdə Teymur Məmmədov rəqibi üzərində 2:1 hesabı ilə qələbə qazandı və turnirin 1/4 final mərhələsinə adladı. Bu mərhələdə isə onun rəqibi Türkiyə nümayəndəsi Mehmet Ünal oldu. Gərgin idman mübarizəsi şəraitində baş tutan görüşdə Teymur Məmmədov rəqibinə 1:2 hesabı ilə məğlub oldu və olimpiya lisenziyasına sahib ola bilmədi. Turnirdən sonra Teymur Məmmədov müsahibəsində buraxdığı səhvlərə görə məğlub olduğunu bildirdi.

Son lisenziya turniri 16–25 iyunda Azərbaycanda baş tutan Dünya Olimpiya Təsnifat Turniri idi. Bu turnir Teymur Məmmədovun olimpiya lisenziyasına sahib olması üçün son şans idi. Təsnifat mərhələsindən azad olan Teymur Məmmədov 1/16 final mərhələsində Çin nümayəndəsi Şi Yucun ilə üz-üzə gəldi. Həmin görüşdə Teymur Məmmədov rəqibi üzərində 3:0 hesabı ilə qələbə qazandı və 1/8 final mərhələsinə adladı. Bu mərhələdə onun rəqibi Gürcüstan nümayəndəsi Yaqo Kiziriya oldu. Gərgin idman mübarizəsi şəraitində baş tutan görüşdə Teymur Məmmədov rəqibinə 2:1 hesabı ilə qalib gəldi və turnirin 1/4 final mərhələsinə adladı. Bu mərhələdə onun rəqibi Mərakeş nümayəndəsi Həsən Saada oldu. Amma rəqib görüşdən imtina elədiyinə görə görüş baş tutmadı və Teymur Məmmədov qalib elan edildi. Bununla da turnirin yarım-final mərhələsinə vəsiqə qazanan Teymur Məmmədov olimpiya lisenziyasının sahibi oldu. Formal əhəmiyyətə sahib olan yarım-final mərhələsində onun rəqibi Rusiya nümayəndəsi Pyotr Xamuxov oldu. Amma rəqib zədə aldığına görə görüş baş tutmadı və Teymur Məmmədov turnirin fial görüşünə vəsiqə qazandı. Həlledici görüşdə onun rəqibi Almaniya nümayəndəsi Sergey Miçel oldu. Final görüşüdə formal əhəmiyyətə sahib idi. Buna görə də rəqib görüşdən imtina elədi və Teymur Məmmədov turnirin qalibi oldu.

Rio-de-Janeyro Olimpiadasından əvvəl Teymur Məmmədov Azərbaycan yığması ilə birgə Birləşmiş Ştatların Kolorado ştatında təlim-məşq toplanışlarında oldu.

2016-cı ilin əsas turniri 5–22 avqustda Braziliyanın Rio-de-Janeyro şəhərində baş tutan XXXI Yay Olimpiya Oyunları oldu. Teymur Məmmədov ideal formada olmasa da, medala iddialı idi.Rio-de-Janeyro Olimpiadasının avqustun 5-də baş tutan açılış mərasimində Teymur Məmmədov Azərbaycan bayrağını apardı. Turnirin təsnifat mərhələsində Teymur Məmmədovun rəqibi Ukrayna nümayəndəsi Denis Soleno oldu. Avqustun 7-də baş tuta görüşdə Teymur Məmmədov rəqibi üzərində 3:0 hesabı ilə qələbə qazandı və Rio-de-Janeyro Olimpiadasının 1/8 final mərhələsinə adladı. Görüşdən sonra müsahibəsində Teymur Məmmədov rəqibin zəif idmançı olmadığını, qələbənin asan əldə edilmədiyini bildirdi.Rio-de-Janeyro Olimpiadasının 1/8 final mərhələsində onun rəqibi Niderland nümayəndəsi Peter Müllenberq oldu. Teymur Məmmədov ötən il baş tutan Avropa Oyunları zamanı Peter Müllenberqa qalib gəlmişdi. Avqustun 12-də baş tutan görüşdə də Teymur Məmmədov rəqibi üzərində 3:0 hesabı ilə qələbə qazandı və Rio-de-Janeyro Olimpiadasının 1/4 final mərhələsinə adladı. Yarım-final mərhələsinə gedən yolda onun rəqibi Qazaxıstan nümayəndəsi Adilbəy Niyazimbəyov idi. Adilbəy Niyazimbəyov dörd il əvvəl London Olimpiadasının finalçısı olmuşdu. Avqustun 15-də baş tutan görüş gərgin idman mübarizəsi şəraitində baş tutdu. Nəticədə Teymur Məmmədov rəqibinə 0:3 hesabı ilə məğlub oldu və Rio-de-Janeyro Olimpiadasını beşinci pillədə başa vurdu. Azərbaycan yığmasının məşqçisi görüşdən sonra müsahibəsində Teymur Məmmədovun məğlubiyyətini rəqibin təcrübəli olması ilə əlaqələndirdi. Teymur Məmmədov isə müsahibəsində görüşün əvvəlindən düzgün döyüş üslubu seçmədiyinə görə məğlub olduğunu bildirdi.

2017-ci il: İslamiadada qələbə və idmanla vidalaşması

Olimpiadadan sonra Teymur Məmmədovun birinci turniri 2017-ci ilin yanvarında baş tutan Azərbaycan Çempionatı oldu. Finala gedən yolda bütün rəqiblərinə qalib gələn Teymur Məmmədov final görüşündə Rahil Məmmədli üzərində 3:0 hesabı ilə qazandı və Azərbaycan çempionu oldu.

Martda isə Teymur Məmmədov Great Silc Way beynəlxalq turnirində mübarizə apardı. Turnirin 1/4 final mərhələsində Teymur Məmmədov Rusiya nümayəndəsi Daniel Lutay ilə üz-üzə gəldi. Həmin görüşdə rəqibinə 3:2 hesabı ilə qalib gələnə Teymur Məmmədov turnirin yarım-final mərhələsinə adladı. Finala gedən yolda onun rəqibi Özbəkistan nümayəndəsi Sardor Beqaliyev oldu. Bu görüşdə də Teymur Məmmədov rəqibi üzərində qələbə qazandı (4:1) və turnin final görüşünə vəsiqə qazandı. Həlledici görüşdə onun rəqibi Ukrayna nümayəndəsi Artyom Usi oldu. Bu görüşdə Teymur Məmmədov rəqibi üzərində 5:0 hesabı ilə inamlı qələbə qazandı və beynəlxalq turnirin qalibi oldu.

Daha sonra Teymur Məmmədov 12–28 mayda baş tutan IV İslam Həmrəyliyi Oyunlarında mübarizə apardı. Teymur Məmmədov mayın 13-də turnirin 1/4 final mərhələsində Özbəkistan nümayəndəsi Sardor Beqaliyev ilə üz-üzə gəldi. Teymur Məmmədov 2 ay əvvəl qalib gəldiyi rəqibi üzərində bu səfər də qələbə qazandı (4:1) və turnirin yarım-final mərhələsinə adladı. Bu mərhələdə isə onun rəqibi Suriya nümayəndəsi Ala Aldi Qosson oldu. Bu görüşdə Teymur Məmmədov rəqibinə 4:1 hesabı ilə qalib gəldi və IV İslam Həmrəyliyi Oyunlarının final görüşünə vəsiqə qazandı. Həlledici görüşdə onun rəqibi Türkiyə nümayəndəsi Burah Aqşin oldu. Teymur Məmmədov həmin rəqibinə yeddi il əvvəl məğlub olmuşdu. Mayın 18-də Kristal Zalında baş tutan final görüşü gərgin idman mübarizəsi şəraitində baş tutdu. Nəticədə isə Teymur Məmmədov rəqibi üzərində 3:2 hesabı ilə qələbə qazandı və IV İslam Həmrəyliyi Oyunlarının qalibi oldu.

Bu turnir Teymur Məmmədov üçün sonuncu oldu. Teymur Məmmədov əvvəlcə iyunda baş tutan Avropa Çempionatında zədə səbəbilə mübarizə aparmadı. Daha sonra isə Teymur Məmmədov ümumiyyətlə heç bir turnirdə çıxış eləmədi və 24 yaşında idmanla vidalaşdı.

2022-ci il mayın 7-də Teymur Məmmədov yeniyetmələrdən ibarət Azərbaycan yığmasının məşqçisi vəzifəsinə təyin edildi.

Karyerası ərzində Teymur Məmmədov azı 87 dəfə döyüşüb. Teymur Məmmədov bu görüşlərin 75-də qələbə qazanıb, 12-də isə məğlub olub.

•   "Tərəqqi" medalı — Azərbaycan Prezidenti İlham Əliyevin 31 avqust 2012-ci il tarixli 2399 nömrəli Sərəncamına əsasən XXX Yay Olimpiya Oyunlarında qazandığı nailiyyətlərə və Azərbaycan idmanında xidmətlərinə görə Teymur Füzuli oğlu Məmmədov "Tərəqqi" medalı ilə təltif edildi.
•   "Şöhrət" ordeni — Azərbaycan Prezidenti İlham Əliyevin 29 iyun 2015-ci il tarixli 1299 nömrəli Sərəncamına əsasən I Avropa Oyunlarında qazandığı nailiyyətlərə və Azərbaycan idmanında xidmətlərinə görə Teymur Füzuli oğlu Məmmədov "Şöhrət" ordeni ilə təltif edildi.

2018-ci ildə dönəmin Azərbaycan Milli Olimpiya Komitəsinin Baş Katibi Ağacan Abıyev Teymur Məmmədov barəsində bu sözləri demişdi:

Teymur Məmmədov rinqdə hesablayaraq zərbə vuran, döyüş aparan idmançılardandır. Hara gəldi vuran, necə gəldi vuran idmançı deyil. Bizim yığmada elə idmançılar var. Hara gəldi, necə gəldi zərbələr endirirlər. Döyüş başlayanda hara, necə gəldi, ağına-bozuna baxmadan zərbə endirir, sonda da özü zərbə buraxır. Amma Teymur Məmmədov elə idmançı deyil. Onun sifətinə diqqət edən. 12 ildir idmanla məşğul olur, o qədər döyüşləri olub, amma idmançıya oxşamır. Bunun səbəbi onun zərbə almamasındadır. O, çalışır rəqibi açılsın, həmin nöqtəyə zərbələr endirsin və xallar qazansın. Teymur Məmmədov əsl ingilis üslubunda döyüşür. İngilislərdə belə söz var — "rinqdə məhəllə davası yox, qılınc davası olmalıdır". Teymur Məmmədov məhz belə idmançılardan idi.

— Azərbaycan Milli Olimpiya Komitəsinin Baş Katibi Ağacan Abıyev, 2018-ci il

2018-ci ildə Teymur Məmmədovun həyatı və uğurlarından bəhs edən "Çempion: Teymur Məmmədov" adlı sənədli-film lentə alınıb. Filmin rejissoru . Film İdman TV-də (o dövrdə adı İdman Azərbaycan TV idi) təqdim edilib.

• Azərbaycan 2012 Yay Olimpiya Oyunlarında
• Azərbaycan 2016 Yay Olimpiya Oyunlarında