Orlando Mecik NBA-ya 1989-cu ildə, liqanın genişləndiriliməsinin 2-ci mərhələsində Minnesota Timbervulvzla birlikdə Mayami ilə Şarlotdan bir il sonra qədəm qoyub. Əvvəlcə liqa rəhbərliyi 3 yeni komandanın yaranmasını nəzərdən keçirirdi. Onlardan biri Floridada yerləşməliydi. Lakin Mayami və Orlando ayrı-ayrılıqda liqaya çox əlverişli təklif göndərdiklərinə görə Asosasiya hər iki komandanı qəbul etmək məcburiyyətində qalır. Klubun adının seçimi üçün azarkeşlər arasında sorğu keçirilir. Nəticədə 4296 təklifdən Mecik seçilir.

Komanda ev oyunlarını 20 min azarkeş tutumuna malik Amvay Sentrdə keçirir. Orlandonun ilk baş məşqçisi Mett Quokas olub. 1989-cu ildə genişləndirmə seçmələrində Mecik 12 oyunçu ilə heyətini qurur. NBA seçmələri zamanı isə 11 nömrə ilə Nik Andersonu seçir. Qeyd edək ki, həmin müddətdə qəbul edilən 4 komanda arasında bu günə qədər ən uğurlu nəticəni məhz Orlando nümayiş etdirib. Belə ki, Mecik 21 mövsümün 12-də pleyofda oynamaq imkanı qazanıb.