Korsika (fr. Corse [kɔʀs], Corsica) — Aralıq dənizinin şimal hissəsində ada. Fransa ərazisidir. Sah. 8,7 min km². Şimal sahili hamar, qərb sahili rias tiplidir, körfəzlərlə kəskin parçalanmışdır. Maksimal hündürlüyü – 2710 m (Mon-Sento dağı). Qranit və gilli şistlərdən təşkil olunmuşdur. Adanı Apenin yarımadasından Korsika boğazı, Sardiniya adasından isə Bonifaco boğazı ayırır. Aralıq dənizi iqliminə malikdir. İllik yağıntı 650–1000 mm. Çayları (Qolo, Tavinyano və s.) qısa və astanalıdır. Əsas bitkisi makvisdir. Daş palıd, mantar palıd və s. meşələri var. Dağların yuxarı hissələri subalp və alp çəmənləridir. Subtropik bitkilər, arpa, buğda, qarğıdalı yetişdirilir. Əsasən üzümçülük, həmçinin bağçılıq, bostançılıq, heyvandarlıq, turizm inkişaf etmişdir. Mühüm şəhərləri və portları Ayaçço və Bastiyadır. Korsika qədimdən İberiya və Liquriya tayfaları tərəfindən məskunlaşmışdı. E.ə. 3-2 əsrlərdə Roma işğal etmişdi. 6-8 əsrlərdə Bizansa məxsus idi. 1347 ildə burada Genuyanın hökmranlığı bərqərar oldu. 1729 ildə korsikalıların yadelli ağalığına qarşı üsyanı başlandı. Kompyen konvensiyası (1764) və Versal müqaviləsinə (1768) görə Fransanın tabeliyinə keçdi, 1796 ildə isə qəti olaraq ona birləşdirildi. 1942 ilin noyabrında Korsikanı italyan və alman qoşunları işğal etdi. Napoleon Bonapart Korsikadakı Ayaçço şəhərində doğulmuşdur.

Korsika
Corsica
Bayraq[d] Gerb
42°09′ şm. e. 9°05′ ş. u.
Ölkə	Fransa
İnzibati mərkəz	Ayaçço
Tarixi və coğrafiyası
Yaradılıb	11 yanvar 1970
Sahəsi	8.680 km²
Saat qurşağı	UTC+01:00 UTC+02:00
Əhalisi
Əhalisi	349.465 nəf. (1 yanvar 2022)
Rəqəmsal identifikatorlar
ISO kodu	FR-20R
Vikianbarda əlaqəli mediafayllar