Əliyev Baldadaş Məhəmməd oğlu — həkim, Lənkəran səhiyyəsinin təşkilatçılarından biri, səmərələşdirici. 1936-cı ildə Lənkəran rayonunun Lüvəsər kəndində anadan olmuşdur. Lüvəsər kənd orta məktəbində ibtidai məktəbi bitirmiş, daha sonra Bakı şəhər 165, 194 saylı və Lənkəran şəhər 4 saylı rus məktəblərində təhsilini davam etdirmişdir. 1961-ci ildə Stomatologiya fakültəsinin rus sektorunu bitirmişdir. Əmək fəaliyyətinə Lənkəran Rayon Mərkəzi Xəstəxanasında diş həkimi kimi başlamışdır.

1966-cı ildə ixtisasartırma kursu keçərək qulaq-boğaz-burun həkimi ixtisasına yiyələnmiş və həmin ildən Lənkəran Rayon Mərkəzi Xəstəxanasında "Qulaq-boğaz-burun" şöbəsinin müdiri vəzifəsində çalışmışdır.

İxtisasını təkmilləşdirmək məqsədilə dəfələrlə SSRİ-nin müxtəlif şəhərlərində — Bakı, Tbilisi və Kiyevdə ixtisasartırma kurslarında olmuşdur.

1972-ci ildə Lənkəran Rayon Mərkəzi Xəstəxanasında səhiyyə üzrə partiya təşkilat katibi, 1974–80-ci illərdə isə Lənkəran MRX-nın baş həkimi vəzifələrində çalışmışdır.

Baş həkim vəzifəsində işləyərkən Lənkəranda yeni xəstəxana kompleksinin tikilməsinin təşəbbüskarı olmuş, qısa müddətdə müasir tipli xəstəxana, poliklinika, dispanser və s. tibb obyektlərinin tikilib istifadə verilməsinə nail olmuş, əyalət səhiyyəsini paytax səviyyəsinə qaldırmışdır.

1981-ci ildən təqaüdə çıxana qədər (2011-ci il) "Qulaq-boğaz-burun" şöbəsinin müdiri işləmişdir. Yüksəkixtisaslı həkim kimi tanınan Baldadaş Əliyev adi cərrahi əməliyyatlarla yanaşı, keçmiş SSRİ məkanında ən ağır və mürəkkəb əməliyyatlar aparmışdır. B. Əliyevin həmin əməliyyatları haqqında SSRİ-nin 1 saylı tibb jurnalı olan "Uxo, qorlo, nos" jurnalında xüsusi məqalə çap edilmişdir. Qeyd edilməlidir ki, son illərə qədər cərrahlar həmin əməliyyatlarda B. Əliyevə istinad edirlər.

B. Əliyev ixtiraçı həkimdir. O, 350-dən artıq ixtira, səmərələşdirici təklif və ideyalar müəllifidir. Onlardan 9-na SSRİ Dövlət İxtira Komitəsi, Rusiya Federasiyası Dövlət İxtira Komitəsi tərəfindən müəlliflik şəhadətnaməsi və patentlə bağlı sənədlər verilmişdir.

Baldadaş Əliyevin tarxi xidmətlərindən biri də Həzi Aslanova II dəfə Sovet İttifaqı Qəhrəmanı adının verilməsini meydana çıxarmasıdır. O, general-mayor H. Aslanovun şəxsi həkimi olmuş Q. R. Beqişvilini axtarıb tapmış, onun arxiv sənədlərində 40 ildən artıq gizli qalmış bu tarixi əhəmiyyətli faktı üzə çıxarmış və müvafiq dövlət orqanlarına təqdim etmişdir.^{[mənbə göstərin]}