Aqşin Məsimov 1962-ci il iyulun 1-də Gürcüstanın Bolnisi rayonunun Abdallı kəndində dünyaya göz açıb. 1978-ci ildə Abdallı kənd orta məktəbini bitirdikdən sonra 16 yaşında Madneuli Missaflaşdırma Kombinatında avtomobil çilingəri kimi əmək fəaliyyətinə başlayıb. 1980–85-ci illərdə Azərbaycan Dövlət Universitetinin kimya fakültəsində təhsil alıb.
Ali təhsil aldığı illərdə "Bakı", "Baku", "Kommunist", "Şahmat" və "Şaxmatı" qəzetlərinin təşkil etdiyi şahmat kompozisiyalarının qiyabi həlli üzrə müsabiqələrin dəfələrlə qalibi olub; sonra isə 1984-cü ildən etibarən əyani həll üzrə Azərbaycan çempionatlarına dəvət alıb və əsas uğurları da elə bundan sonra başlayıb.
Aqşin Məsimov şahmat məsələ və etüdlərinin əyani həlli üzrə Azərbaycan çempionatlarında ilk uğurunu 1987-ci ildə qazanıb – 3-cü yer.
Aqşin Məsimov şahmat məsələ və etüdlərinin əyani həlli üzrə Gürcüstanın 1-ci çempionatının bürünc mükafatçısıdır: 1990-cı il – 3-cü yer.
Aqşin Məsimov şahmat məsələ və etüdlərinin əyani həlli üzrə 7 dəfə Azərbaycan vitse-çempionu adına layiq görulub (1993, 1995, 1996, 1997, 1999, 2001, 2002).
Şahmat məsələ və etüdlərinin əyani həlli üzrə Azərbaycan çempionatının bürünc mükafatına (III yer) ən çox (8 dəfə) Aqşin Məsimov layiq görulub (1987, 1991, 1994, 2003, 2005, 2006, 2007, 2010).
Şahmat məsələ və etüdlərinin əyani həlli üzrə dünya çempionatlarında Azərbaycanı ilk dəfə məhz Aqşin Məsimov təmsil edib: 5–15 sentyabr 1997-ci il – Pula şəhəri, Xorvatiya.
Aqşin Məsimov 1997-ci ildə Xorvatiyanın Pula şəhərində keçirilən şahmat kompozisiyası üzrə 40-cı beynəlxalq konqresdə Azərbaycanı FİDE nəzdində Şahmat Kompozisiyası Daimi Komissiyasına 35-ci üzv seçdirib. Azərbaycan nümayəndəsi kimi o bu təşkilatda 1997-ci ilin sentyabrından 2010-cu ilin oktyabrınadək ölkəmizi təmsil edib.
Azərbaycan həllçiləri arasında FİDE ustası balını ilk dəfə Aqşin Məsimov qazanıb – Xorvatiyanın Pula şəhəri, 8 sentyabr 1997-ci il, "Open-turnir".
Aşağıdakı məlumatlar bu baxımdan ibrətamizdir:
The following solvers fulfilled one norm for the title of FIDE Master in solving:
Eddy van Beers (Belgium), Michal Dragoun (Czechia), Borislav Gadjanski (Yugoslavia), Hannu Harkola (Finland), Emil Klemancic (Slovakia), Marek Kolcak (Slovakia), Valeri Kopyl (Ukraine), Thomas Maeder (Switzerland), Ayshin Masimov (Azerbaijan), Oleg Pervakov (Russia), Ronald Schäfer (germany), Valeri Semenenko (Ukraine), Lubomir Siran (Slovakia), Axel Steinbrink (Germany), and Hans Uitenbroek (Netherlands).
Azərbaycanı həlletmə üzrə dünya çempionatlarında Aqşin Məsimov 7 dəfə təmsil edib: 1997 – Xorvatiyanın Pula şəhəri; 1998 – Rusiyanın Sankt-Peterburq şəhəri (Araz Alməmmədov və Anatoli Piriverdiyevlə birlikdə ilk dəfə komanda üzrə); 24–31 oktyabr 1999 – İsrailin Netanya şəhəri (Anatoli Piriverdiyev və Bəxtiyar Rüstəmovla birlikdə komanda üzrə); 2003 – Rusiyanın Moskva şəhəri; 16–23 oktyabr 2010 – Yunanıstanın Krit adası; 21–27 sentyabr 2013 – Gürcüstanın Batumi şəhəri (Araz Alməmmədov və Ramil Cavadovla birlikdə komanda üzrə), 30 iyul – 6 avqust 2016 (həlletmə üzrə 40-cı dünya çempionatı) – Serbiyanın Belqrad şəhəri.
Aqşin Məsimov Azərbaycanı həlletmə üzrə Avropa çempionatlarında da (4 dəfə) təmsil edib: 2008 (Türkiyənin Antalya şəhərində Ramil Cavadov, Araz Alməmmədov və Samir Kərimovla birlikdə ilk dəfə komanda üzrə), 2010 (İngiltərənin London şəhərinin yaxınlığındakı Sunningdeyl şəhərciyində Ramil Cavadov və Araz Alməmmədovla birlikdə komanda üzrə), 2011 (Polşanın Loviç şəhərində Ramil Cavadov, Araz Alməmmədov və Zaur Məmmədovla birlikdə komanda üzrə) və 2013-cü illərdə (Ramil Cavadov, Araz Alməmmədov və Anatoli Piriverdiyevlə birlikdə Litvanın Vilnüs şəhərində komanda üzrə).
Qeyd edək ki, şahmat kompozisiyalarının həlli tarixində ilk dəfə məhz 2011-ci ildə Polşanın Loviç şəhərində keçirilən Avropa çempionatında mükafat fondu (2500 avro) yaradılıb!
2011-ci il fevralın 5-i və 6-da Moskvada 5 ölkədən (Rusiya, Azərbaycan, Belarus, Ukrayna və Finlandiya) olan 29 həllçinin iştirakı ilə keçirilən həlletmə üzrə III dünya kubokunda ilk dəfə 4 Azərbaycan çempionu – Viktor Lukyanov (V Azərbaycan çempionu, 1993-cü ildən Rusiyanın Stavropol diyarında yaşayır), Araz Alməmmədov (VIII Azərbaycan çempionu, Qəbələ rayonunun Vəndam kəndində yaşayır), Aqşin Məsimov (IX Azərbaycan çempionu, Bakıda yaşayır) və Ramil Cavadov (X Azərbaycan çempionu, İsmayıllı rayonunun İsmayıllı kəndində yaşayır) iştirak edib və nəticə gözlənildiyindən də uğurlu olub: 1-ci turdan sonra 26 xalla rusiyali Aleksandr Ajusinlə, 2-ci turdan sonra isə 46 xalla təkbaşına liderlik edən Ramil Cavadov sonuncu – 4-cü turdan sonra 74 xalla 5-ci yeri tutub və ölkə həllçiləri arasında ilk dəfə mükafat (10.000 rubl) qazanıb; Aqşin (49 xalla 21-ci yer) və Araz (61,5 xal, 14–15-ci yerlər) isə prinsipial mübarizə şəraitində (onlar Azərbaycan çempionatlarında Viktor Lukyanovu heç vaxt geridə qoya bilməmişlər!) ilk dəfə Viktor Lukyanovu (48,75 xal, 22-ci yer) geridə qoyublar! Dünya kubokunu isə 86,5 xal toplayan dəfələrlə dünya çempionu Georgi Yevseyev qazanıb.
2012-ci il fevralın 4-ü və 5-i tarixlərində Moskvada keçirilən IV dünya kubokunda iştirak edən Aqşin Məsimov ötənilki nəticəsini yaxşılaşdıraraq 37 iştirakçı arasında 50,1 xalla 17-ci nəticə göstərib!