İlhamə Nasir (İlhamə Nasir qızı Kərimova) 27 aprel 1978-ci ildə Qubadlı rayonu Diləli Müskənli kəndində ziyalı ailəsində anadan olub.

Yaradıcılığa 8 yaşından başlayıb. , jurnallarında, Qubadlı rayonun qəzetində şeir və hekayələri dərc olunub. 1995-ci ildə Bakı Dövlət Universitetinin "Sosial elmlər və psixologiya" fakültəsinə daxil olub və 1999-cu ildə sosiologiya ixtisası ilə oranı bitirib. 1998-ci ildə Azərbaycan Dövlət Televiziyasında yayımlanan "Açar" verilişində aparıcılıq edib.

Sonrakı illərdə dövrü mətbuatda redaktor kimi fəaliyyət göstərib. 2014-cü ildə Təbriz televiziyasında yayımlanan "Axşamlar" proqramının aparıcısı və redaktoru kimi çalışıb.

2015-ci ildən Kulis.az ədəbiyyat portalında, Vetensesi.qmkdk.gov.az, Goyche.az saytlarında, "Vətən səsi" qəzetində və "Ulduz", "Qobustan" jurnallarında müxtəlif publisistik yazıları, reportajları, bədii əsərləri yayımlanır.

2017-ci ildən "Vətən-TV" İnformasiya agentliyinin və saytın təsisçisi, baş redaktorudur. 2017-ci ildə "Yazılmamış tale", 2022-ci ildə "İşıq" adlı kitabları çap olunub.

2020-ci ildən "Space" MTRŞ-də yayımlanan "El bizim, sirr bizim", "Gərgin saat", "Elin sözü" tok-şoularının və "Elin gözü", "Elə çarə" proqramlarının baş redaktoru kimi çalışır.

2021-ci ildə Kulis.az ədəbi saytının təşkil etdiyi müsabiqədə 209 hekayə arasında "Qırmızı darvaza" əsəri ilk onluğa düşüb.

Bir sıra bədii əsərləri tərcümə olunaraq xarici mətbu orqanlarında yayımlanıb. Şeirləri əsasında mahnılar və serial saundtrekləri yazılıb.

Tanınmış yazıçı İlhamə Nasir Qubadlı işğalının son günlərini, məcburi köçkün həyatının məşəqqətlərini əks etdirən "İşıq" adlı romanı ədəbi mühitdə böyük əks-səda yaratdı.

Roman işğal altında olan yurdunu görmək üçün Arazı gizli yolla keçən jurnalist İşıq Qubadlının qeydlərindən bəhs edir.

Müəllif bədii dillə erməni vandalizmini, narkotik ticarətini və insanlığa qarşı törədilən vəhşilikləri faktlarla təqdim edir. Real həyat əhvalatları əsasında İranda azərbaycanlılara olan amansız işgəncələri göstərir. Həmçinin İran həbsxanasında günahsız qadınlara qarşı törədilən dəhşətli cəzaları, iyrənclikləri, psixoloji təzyiqləri bədii təsvir vasitələri ilə tam çatdıra bilir. Əsərin qəhrəmanı İşıq, Qubadlıdan geri qayıdarkən İran irticasının qurbanına çevrilir. Gənc qızı İranın ən amansız və qəddar zindanına salırlar.

• "Yazılmamış tale", Bakı, "Araz", 2017

• "İşıq", Bakı, "Elm və Təhsil", 2022