Təbriz Həsənov (15 iyun 1967) — keçmiş azərbaycanlı futbolçu. Hazırda karyerasını Sabah futbol klubunda koordinator vəzifəsində davam etdirir. Azərbaycan U-21; U-19; U-17; U-16 milli futbol komandasında baş məşqçilik edib. Futbolçu karyerası dövründə mərkəz yarımmüdafiəçisi mövqeyində çıxış edən oyunçu əsasən hücuma meyilli futbol sərgiləyirdi. Müxtəlif illərdə Termist Bakı, Göyəzən FK və Qarabağ FK-nın heyətində top qovan Təbriz Həsənov Azərbaycanın əsas millisində bir dəfə forma geymək şansı qazanıb. Həmin qarşılaşma 1994-cü ildə yoldaşlıq oyunu çərçivəsində Moldovaya qarşı keçirilən görüş olmuşdur ki, 90 dəqiqə meydanda olan Təbriz sonda 2–1 hesablı məğlubiyyətlə üzləşmişdi. Karyerası ərzində 288 oyun keçirmiş və bu görüşlərdə 25 dəfə fərqlənə bilmişdi. 1992-ci ildə Neftçi PFK, 1993-cü ildə isə Qarabağ FK ilə Azərbaycan çempionluğunu yaşamışdır. O həmçinin "Qarabağ" ilə bir dəfə Azərbaycan Kubokunu da başı üzərinə qaldırmışdır.