Dəmir Vahid oğlu Hacıyev 29 yanvar 1929-cu ildə Qax rayonunun İlisu kəndində ziyalı ailəsində anadan olmuşdur. Onun atası alim-paleontoloq Hacıyev Vahid Hüseynəli oğlu respublikanın müxtəlif ali təhsil müəssisələrində, eləcə də elmi sovet və partiya idarələrində çalışmışdır. Anası – N.Nərimanovun qardaşı qızı Xanım Salman qızı Nərimanova müəllimə olmuşdur. Dəmir Hacıyev 1946-cı ildə məktəbi bitirdikdən sonra Azərbaycan Dövlət Tibb İnstitutuna daxil olub, 1952-ci ildə İnstitutu bitirib uşaq cərrahı ixtisasına yiyələnmişdir.

Dəmir Hacıyev 1961-ci ildə “Eldar bozqırı­mın üst sar­mat hipparion faunası” mövzu­sun­da nami­zəd­lik dissertasiyasını müdafiə etmiş və bu işinə görə o, biolo­giya üzrə elm­lər doktoru elmi dərəcəsinə layiq görülmüş­dür. 1963-cü ildə Azərbay­can Dövlət Univer­sitetinin Onurğalılar zoologiyası kafedra­sında professor vəzifə­sinə seçilmiş, 1964-cü ildə professor elmi adını almış­dır.

Dəmir Hacıyev 1964-cü ildən əmək fəaliyyətini Azərbaycan Dövlət Tibb İnstitutunda davam etdirmiş və “Ümumi biologiya və genetikanın əsasları” kafedrasının müdiri vəzifəsinə seçilmişdir. 1965-ci ildən 1969-cu ilədək kafedraya rəhbərliklə yanaşı, ADTİ-nin elmi işlər üzrə prorektoru olaraq da çalışmışdır. 1967-1968-ci illərdə D.Hacıyev Səhiyyə Nazirliyinin Elmi Şurasının sədri, 1968-1970-ci illərdə Azərbaycan EA Geologiya İnstitutunun Paleobiologiya şöbəsinin müdiri olmuşdur. Qeyri-adi tədqiqat və təşkilati keyfiyyətlərə malik olan Dəmir Hacıyev Azərbaycan EA Geologiya İnstitutunun təkamül paleontologiyası laboratoriyasının rəhbərliyi ona həvalə olunmuş, eyni zamanda Azərbaycan EA-nın Biologiya şöbəsinin akademik-katibinin müavini, həmçinin biologiya üzrə Ali Attestasiya Komissiyasının ekspert komitəsinin sədri vəzifələrində çalışmışdı. 1971-1974-cü illərdə isə Azərbaycan Dövlət Tibb İnstitutunun təhsil və elmi işlər üzrə prorektoru olmuşdur. 1972-ci ildə Azərbaycan Elmlər Akade­mi­yasının müxbir üzvü seçilmişdir.

Dəmir Hacıyevin elmi nailiyyətləri beynəlxalq səviyyədə tanınmışdır. 12 monoqrafiya və 120 elmi məqalənin müəllifidir, xaricdə peşəkar dairələrdə tanınmışdı. 1958-ci ildən o, İllinois Elmlər Akademiyasının (ABŞ), 1996-cı ildən isə Nyu-York Elmlər Akademiyasının (ABŞ) üzvü olmuşdur.

Əsərləri

• Qazıntı halında tapılan kərgədanların qabırğalarının travmatik zədələnməsi.
• Qazıntı halında tapılan Binəqədi canavarlarının sümüklərində raxit zədələnmələrin əlamətləri.
• Qazıntı halında tapılan dördüncü dövr canavarında spondilozun deformasiyası fenomeni.
• Binəqədi ibtidai öküzünün üst çənəsinin osteomeliti.
• Biologiya (Praktiki məşğələlər üçün dərslik), Bakı, 1991.
• Tibbi biologiya (Dərslik), Bakı, 1993.
• Biologiya üzrə 1000 test, Bakı, 1993.
• Molekulyar biologiya və tibbi genetikaya aid məsələlər kitabı, Bakı, 1994.
• Hüceyrə səviyyəsində genetik hadisələr, Bakı, 1996.
• İnsanın xromosom və molekulyar xəstəlikləri, Bakı, 1996.
• Hüceyrə biologiyasının molekulyar aspektləri, Bakı, 1996.
• Molekulyar səviyyədə genetik hadisələr, Bakı, 1996.
• Qədim Azərbaycanda kəllə trepanasiyası.
• Yerüstü yırtıcıların beyninlərin xarici relyef strukturunun bəzi xüsusiyyətləri.
• Nadir hallarda yarasalarda çoxdöllülük.
• Forestye xəstəliyinin paleontologiyası və müqayisəli patologiyası.
• Binəqədi asfalt gölündə qazıntı halında tapılan heyvan qalıqlarında amin turşuları.
• İnsan ekologiyası və biosferin mahiyyəti, Bakı, 1994.

•   — "Vladimir İliç Leninin anadan olmasının 100 illiyi münasibətilə" yubiley medalı (1970)
•   — "Qırmızı əmək bayrağı" ordeni (1971)
•   — Azərbaycan Respublikasının əməkdar elm xadimi (1981)
• Vavilov ad. Qırmızı medal (1983)
• Ekologiya sahəsində nailiyyətlərinə görə diplom və Həsən Əliyev ad. mükafat (1996)

Hacıyev Dəmir Vahid oğlu 20 iyun 1999-cu ildə vəfat etmişdir.